EL SCALDIN¹⁹

Son tondo, son picolo,

Son fato de tera;

In mezo a le tecie²⁰

Son stà fabricà;

E quando che luçido

Gnancora²¹ no gera,

El mogio²², el sol torido,

Poarin²³, go provà

Lavoro finissimo

Mi d'esser no credo;

Ufizio ben umile

Me incorzo²⁴ d'aver:

De piati, de cicare²⁵

Fradelo me vedo,

El mio gran artefiçe

Xe stà un pignater²⁶

De mi se desmentega

Per più de mezo ano

Chi amigo carissimo

M'à za dito un dì;

Ma questo xe un utile

Piutosto che un dano,

Perché xe più façile

Che dura cussì

Co' ariva qua el tiepido

Calor de le ariete,

Finisso el servizio,

Finisse el dafar,

E fra ratatuie²⁷

Al scuro i me mete,

Finchè vien i brividi

A farve tremar

Co' casca la candida

Zentil biancolina,

Co' 'l vento che fisćia

Vien zo dal camin,

I vien torme subito

Per 'ndar in cusina:

Alora i desidera

L'amigo scaldin!

E co' bronze e cénere

Go dentro e son caldo,

'Na tosa, vardandome,

Se scalda le man

E mi, contentissimo

La vardo e la scaldo:

Xe caro, carissimo

Per mi el fredo can!

E quando, nel massimo

Del fredo, i penini²⁸

Se ingiazza, e informigola²⁹

Nel streto stival,

De soto le cotole³⁰

Piaçeri divini

Mi godo, e fantastico

No gh'è nissun mal

Scaldando, godendome,

Mi passo l'inverno,

Per questo desídero

Che svola l'istà

Al fogo me abituo,

No temo l'inferno

El fredo più rigido

Più caldo me fa!