NE LA QUIETE

Mia Nineta: te par? tuto tase,

Tuto dorme paçifico e queto

Che piaçer che ne dona 'sta pase

Stando qua, da viçini, cussì!

Xe lontan quela gondola nera

E quel remo che l'aqua rompeva

El silenzio seren de la sera

No 'l xe roto cussì dal remar

E l'arieta che passa, che sfiora

El to viso belissimo e caro

Via la core, tasendo, e ne indora

Col so' ciaro la luna del çiel

E seguimo co l'ocio le bele

Nuvolete che passa là in alto,

E contemo la palide stele

Che se risćia vegnerse a mostrar

E la luna ne varda, ridendo,

Tonda, tonda, fasendo de ocieto⁴⁸

Nu ridemo, e se 'ndemo strenzendo

Un co st'altra, parlandose al cuor

Po, su l'aqua che va, tremolando,

Rifletendo, più granda, la luna,

Nu chinemo la testa vardando

Quel belissimo specio del çiel,

E voressimo dirse qualcossa

Per la quiete che dorme, che tase,

Per l'arieta che xe apena smossa,

Che ne ispira, tasendo, l'amor;

Ma vardandose i oci, tasemo,:

Rispetemo el silenzio tranquilo,

E, vardandose, ai cuori parlemo:

Co le ociae⁴⁹ se capimo benon!

Finalmente, strenzendose ancora

Più viçini, contenti, beati,

Finchè 'l caldo respiro ne sfiora

Riscaldandone el viso e anca el cuor,

Nu, coi brazzi⁵⁰ ligandose el colo⁵¹,

Su la boca se demo dei basi:

Ne la quiete soavissima solo

Fa susuro dei basi 'l sćiocar