QUANDO

Quando, Nineta mia, quando saremo

Do veci bianchi, sechi, sdentegai⁷⁵,

Forse 'l tempo passà ne scordaremo

Quando s'avemo tanto idolatrai

No capiremo più come in tel cuor

Ghe sia sta in te quei tempi tanto amor,

No capiremo più, Nina, più mai,

Quanti basi fra nu si sta scambiai

No ricordando più, Nina, l'afeto

Che tuti do 'na volta s'à sentio,

Se trovaremo el desiderio in peto

De riadorar el nostro vecio Dio

Alzaremo la sbezzola⁷⁶, e slongando⁷⁷

El colo e i lavri se 'ndarà çercando

Se tra le rughe mai, per qualche caso,

Ghe fusse el logo adato per un baso

E quando po, ne l'estasi beata

De un baso riuniremo i veci cuori,

Ricordaremo ben la vita mata

Gioconda e dolçe de quei nostri amori

Se vedaremo zoveni e fiorenti,

Ritrovaremo i za scordadi açenti,

E ne l'estasi dolçe, Nina, 'scolta,

Se adoraremo, cara, un'altra volta