VUSTU MONTAR?

I

Nina, la gondola, varda, te speta,

Su l'aqua placida viente¹¹¹ a ninar

'Vanti¹¹², destrighete¹¹³, mia cocoleta:

Vustu¹¹⁴ montar?

La luna arzentea sluse nel çielo:

La fa de ocieto, la dise: «sì!»

Dunque destrighete, anzolo belo,

Vien qua co mi

Come un bel specio del firmamento

Lisso, in silenzio, dorme el mio mar

L'amor ne l'anema, Nina, me sento

Vustu montar?

Zo, vien in gondola, tesoro mio,

Ne la dolçissima pase, co mi,

'Ndemo su l'aqua, d'amor nel nio,

Dime de sì!

Come un bel specio del firmamento,

Lisso, in silenzio, dorme el mio mar

L'amor ne l'anema, Nina, me sento

Vustu montar?

II

Xe la nostra Giudeca un incanto

De bengala, de mile colori:

Gh'è un giardin sora l'aqua, gh'è fiori,

Gh'è 'l riflesso de un splendido çiel

Vustu montar? La gondola

Nineta mia, xe pronta;

Dame la man, zo, monta,

Andemo al Redentor!

No pensar che la mama te cria¹¹⁵

Se co mi ti vegnessi a la festa;

Se la ziga, gran scusa xe questa:

No fasevistu istesso anca ti?

Vustu montar? La gondola,

Nineta mia, xe pronta;

Dame la man, zo, monta,

Andemo al Redentor!

'Ndemo, fidite, presto, Nineta,

Par d'amor la mia gondola un nio:

No pensar a la mama, amor mio,

Vien tra i ciassi¹¹⁶, tra i canti, co mi

Vustu montar? La gondola,

Nineta mia, xe pronta:

Dame la man, zo, monta,

Andemo al Redentor!