GONDOLA NERA

NELL'ALBUM DELLA SIGNORINA L. C

/#

Questa gondola comparo io

ad una culla e la sua cassa

ad una tomba. Appunto così:

fra una culla e la tomba noi

vacilliamo attraversando,

spensierati, pel gran canale,

la vita

Goethe - Epigr

#/

Su l'aqua lissa¹⁵¹, nera

E misteriosa va 'na gondoleta

La pase de la sera

Pesa su l'aqua plaçida del mar

Fresca e zentil l'arieta

Dolçemente continua a susurar

El remo, ogni momento,

Sćiafisa¹⁵², susurando, la laguna;

Tristo come un lamento

Par el canto lontan del gondolier

Dal çiel, e stele e luna

Manda a l'aneme un intimo piaçer

Cussì, nel so' mistero,

La gondoleta va sul mar l'è sola

Su l'aqua un punto nero

Ormai quasi la xe presto sparir

La dovarà, la svola

Se la vede adasieto impicolir

No so perchè, ma quela

Gondola che sul mar presto va via

Nera, zentil e snela,

Dei sentimenti strambi¹⁵³ me dà al cuor;

Ela a l'anema mia

Parla d'amor zentil e de dolor

Dentro ela, tosi amanti

Unisse¹⁵⁴, forse, in uno i so' do cuori,

Do cuori palpitanti

Che nel sogno d'amor i va sul mar;

Soto quel felze, lori¹⁵⁵

Fora del mondo i se sente portar

Ma tanta vita penso

Che forse no ghe xe nel felze nero;

Forse, sul mar imenso

Un morto, povareto, vien portà

Lontan, co quel mistero,

Sul mar lisso, paçifico, incantà!

Prima, me par che stele

E luna ai tosi amanti amar le diga;

Me par che, bionde e bele,

Le canta insieme a l'aria ini d'amor

Dopo, me par le ziga

Le orazïon dei morti e del dolor

De dentro, zentil cuna¹⁵⁶

Del caro amor me par la gondoleta

Che va su la laguna;

De fora¹⁵⁷, nera tomba la me par

Ride o pianze l'arieta

Su la pase infinia de 'sto mio mar