LA VÈNTOLA

Son bela, volubile,

Go piume, go fiori,

Farfale, bei anzoli

Su mi disegnà:

Mi dono fresca aria,

Mi scaldo dei cuori,

Me mostro alegrissima

De inverno e de istà

Mi posso in un atimo

Slargarme¹⁵⁸, far roda,

Più granda, più picola

Mi paro cussì;

Da tanti bei secoli

Son sempre de moda,

In moto carissimo

Mi son note e dì

La bela, belissima

Ganassa¹⁵⁹ mi sfriso¹⁶⁰,

Ma el sfriso¹⁶¹ xe inocuo

Su quel molesin¹⁶²:

Se bianco, se palido

Xe sempre quel viso,

Lo fasso in t'un atimo

Vegner porporin

Se in pressa¹⁶³ mi supio¹⁶⁴

El mio venteselo,

Dei riçi¹⁶⁵ biondissimi

Se move su e zo

El viso de un anzolo

Se mostra più belo

Se i riçi, movendose,

Ve dise: Sì e no

Nel moto mio solito

Che cresse, che cala,

Me mostro volubile,

Liziera, zentil

A un'ala somegio¹⁶⁶

De bionda farfala

Che svola ne l'aria

In magio o in april

'Sta vita belissima

Per mi sempre dura

Finchè bela e splendida

Ancora mi son

Co' 'rivo a essar vecia

Nissun più me cura,

E son messa in pevare¹⁶⁷

In fondo a un casson