IN GONDOLETA

Dame la man e monta, mia Nineta,

Monta, no aver paura;

Ne la mia snela e longa gondoleta

Ti ti pol¹⁷³ star sicura

Mi sarò el gondolier; de mi fidarte

Ti pol, caro mio ben:

Ti sa che sempre, al minimo vardarte,

Palpita forte el cuor in tel¹⁷⁴ mio sen

Da l'alta pope¹⁷⁵ farò andar col remo

La barca come 'l vento

Come in sogno svolar se vedaremo

Tra spolverio d'arzento

La luna bela nel so' splendido arco

Sluserà su nel çiel;

Da lontan vedaremo de San Marco

L'anzolo d'oro sora el campaniel

Storie de amanti cantarà l'arieta

Svolando sora l'onda

Fermando el mio vogar, la gondoleta

Se movarà a seconda

Viçin de ti mi vegnarò, mia Nina,

Parlandote d'amor,

Basandote la picola manina,

Mostrandote l'inçendio del mio cuor

Fregola mia, no diventar, no, rossa,

No stà temer mai gnente¹⁷⁶:

Insieme a mi, pustu temer qualcossa?

Là zo¹⁷⁷, nissun ne sente

Monta, presto, Nineta: anca la luna

Fra nuvole s'à sconta

Varda: xe poco bela la laguna?

Brava! cussì!. Dame la man, zo, monta!