Indice | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
Antonio Negri alias Rataplan In gondoleta IntraText CT - Lettura del testo |
MISTICA
La gera bionda, bionda come 'l mar
Soto un tramonto d'oro;
Se sentiva nel canto suo scherzar
De rusignoli un coro
Splendeva ne i so' oci el senso arcan,
Dolçe del firmamento,
Ghe portava dei basi da lontan
De l'orïente el vento
El mar ninava190 el so' sogno d'amor
Co un'intima dolçezza:
El sol scaldava el so' zovene cuor
Co un'infantil carezza
Le stele che sluseva su nel çiel,
In alto l'atirava;
La luna, col nebioso e bianco vel
A l'anema parlava
*
* *
In una note nera, malinconica,
El vento ga ruzà191,
E el mar, el queto mar, fato teribile,
Orendo, el s'à inrabià192
El sol, el zorno dopo, nel çiel limpido
Sul mar s'à levà su
Da quela note in çiel 'na fulgidissima
Stela ghe xe de più!