MONTA, NINETA, IN GONDOLA

Monta, Nineta, in gondola,

Te condurò lontan su la laguna;

Vien, Nina mia, destrighete,

Chè, fin dal çiel, le palide

Stele te fa l'invito a una, a una

Su l'onda queta e limpida,

El cuor xe più espansivo e più sinçero;

Fra la pase dolçissima

Del mar, del çielo splendido,

L'amor ga un zentil senso de mistero

Adasio, el vento tiepido

Che de l'Oriente porta la carezza,

Ne sonarà la musica

Che sente sole l'aneme

Inamorae, co un'intima dolçezza

E quando po' le nuvole

Vorà ofuscar de la gran luna el viso,

Ne la penombra, palide

Fantasme dirà storie

De cuori innamorai, de paradiso

E da lontan, Venezia

Zentil e ciara¹ sora l'aqua piana,

Velada² un fià³ da nebie

Che più cressa el so' fassino⁴,

Soridarà come oriental sultana

Storie de amor, de spasemi

D'aneme inamorae cantarà el vento;

I nostri cuori zoveni

I sentirà in un'estasi

La divina poesia del firmamento

De la laguna el plaçido

Specio, del çiel rifletarà i splendori;

Ne l'incantà silenzio

Sentiremo a l'unisono

El bater spezzegà⁵ dei nostri cuori

Monta, Nineta, in gondola,

Te condurò lontan su la laguna;

Vien, Nina mia, destrighete,

Chè, fin dal çiel, le palide

Stele te fa l'invito, a una, a una