Canzone delle strazze.

Amor vivemo tra la gata, e i stizzi,

D'una casa a pe pian,

E no vedo però che ti t'agrizzi,

Dove la lume, e 'l pan.

Stà tutto in t'un, la rocca, i drappi, e 'l vin,

La vecchia, e le fassine,

E mezo 'l cavezzal sotto 'l camin,

Dove tacca un'anzin.

Gh'è in modo de Trofeo,

La ferfora, una schufia, e la graela,

La zucca da l'aseo

Un cesto, e la sportela.

E 'l letto fatto d'alega, e de stopa,

Così a valio, ch'i pulisi s'intopa,

In pe d'un papagà s'arlieva un'oca,

In pe d'un cagnoletto.

Gh'è un porchetto zentil, che basa in bocca,

Lassivo animaletto,

Suave compagnia, dolce concerto,

L'oca la gatta, e tutti

La vecchia, e 'l porco, e i putti,

La galina, e 'l mio amor sotto un coverto,

Ma in cento parte discoverto,

Dove la Luna, e 'l Sol.

Fa tanto più la casa aliegra, e chiara,

Come sotto un storiol,

Scondi fortuna avara,

Una zogia, una perla in le scoazze.

Infinita bellezza, in mille strazze,

El concolo dal pan stropa un balcon,

Che n'ha scuri, ne veri,

Magna in pugno ciascun con fal falcon.

Senza tola, ò tagieri,

Sta la famegia intorno a la pignata,

Aspettar, che sia coto

Ogn'un beve in t'un goto.

E tutti sguazza, a un bezzo de salata

Vita vera, e beata,

Un lenzuol fa per sie,

Che da un dì a l'altro a marizà dal fumo.

Man, teste, brazzi, e piè,

Sta in t'un tutti in t'un grumo,

Onde se vede un'ordine a grotesche,

De persone, de bestie, e de baltresche.

In casa chi xe, in camera xe, in sala,

Chi è in sala, e in magazen,

Che monte un lerto in t'una sottoscala

O un in brazzo al mio ben.

Passo la notte di dolcezza piene

Se ben la pioza, e 'l vento,

E vien talvolta drento,

A refrescar l'amor su per le arene.

Note care, e serene,

Caro liogo amoroso,

Beltà celeste in povera schiavina

Togia un letto pomposo.

C'ha dentro una gabrina

Che fa in lù quel effetto un viso d'orca,

Che in bella cheba una gazzuola sporca,

In sta cà benedetta luminosa

Vive poveramente

Sta mia cara d'amor bella, e strazzosa

Strazzosa riccamente,

Che con più strazze e manco drapi intorno,

Più si discovre i fianchi,

E verzeladi, e bianchi

Com'è più bel con manco nuole e 'l zorno,

Habito troppo adorno.

Sopra perle, e rubini,

Pompe elette dal ciel vivi zogieli,

Brazzi fianchi divini,

Occhi, fronte, e caveli.

Lauri de dolce fiogo in dolce fazza,

Dolce viste d'amor fra strazza, e strazza,

A sta beltà de strazze ghe besogna,

Che no se die stroparla.

Lassa covrir de drapi una carogna,

Che stomega a vardarla

Ma quella vita in st'abito resplende

Senza industria, e senz'arte.

Mazenga in ogni parte

Che ne caffi ne veli e 'l bello offende,

Carne bianche, e stupende,

Al ciel nude, e scoverte.

Pur pompa de natura poverete

Andè a sto modo averte,

O colo, o spale, ò rete,

Che no te tagia un guanto ove l'anelo.

Se no perché più bel, questo de quello,

Che drapi poria mai s'i fosse d'oro

Covrir si bei colori,

Che no fosse un leame in s'un tesoro.

Un fango fora i fiori

Và pur così che st'humiltà t'inalza,

Và povereta altiera.

Così co i piè per terra.

Che ti è più bella quanto più descalza

Come 'l ciel me trabalza,

A una bellezza estrema

In t'una casa che no gh'è do scudele.

Providentia suprema,

Del ciel, e de le stelle,

Che xe andà a catar fuora do desperse

Per unir le to strazze co i miei versi.

Strazze mie care ond'ho raccolto e 'l cuor

Dolce strazze amorose

Fenestre de la gratia occhi d'amor,

Strazze fodrae de riose.

Che se vede spontar fra lista, e lista,

Fuora de quei sbregoni

Quattro dea de galoni,

Che traze lanpi, che te tiol la vista.

Fia mia chi no t'ha vista,

E un'huomo mezo vivo,

Chi no te vede, e vive è un zocco morto

E mi che te descrivo.

Sò che te fazzo torto

Che lasso la gloria, e te defraudo,

E te stronzo l'honor più che te laudo,

Podess’io pur (con dar de la mia vita)

trovar più lingue a usura,

Che la mia sola a una beltà infinita

O piccola misura,

Sò che no digo niente a quel, che fasso,

Ma quel puoco, che intendo,

E 'l mesuro, e 'l comprendo,

Co se meusura 'l ciel con un compasso,

In sta bellezza passo,

La mia vita contenta,

E trovo solo la fede in strazze rote,

No n'ho chi me tormenta

Nel zorno, ne la notte.

Ghe xe un voler, un'anema in do petti,

Così co ghe ne molti in puochi letti,

Cerchè done d'haver laghi de pianti

Refoli de sospiri.

E sempre inanze eserciti d'amanti,

Formè niovi martiri,

Nutrive cento diavoli in t'i occhi,

Che tenta i cuor contriti.

Cerche che mile afflitti,

Ve se vegna a butar morti in zenocchi,

Amor sti m'infenocchi,

Mai più frizzeme allhora.

Che te parecchio la farina, e l'ogio,

Questa è la mia Signora,

La me vol, mi la vogio,

Ghe xe un voler, un'anema.

No n'ho qua da rabiar, ne da istizzarme

Chi vuol guerra d'amor se meta in arme,

Canzon mia repezzà,

Sti è per forte represa, e ti reprendi,

Chi te reprenderà

Mostra che ti l'intendi,

E di, che sti n'ha drapi de veluo

Che quel ch'è Dio d'amor và sempre nuo.

IL FINE.