IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
NICOLA (dal fondo, attratto dal frastuono): Che cos’è neh? Ch’è sueccieso? E che ne parlammo a ffà... Aggiu aperta la birreria! E chillu piezz’animale che dorme! (A Vincenzo, gridando:) Viciè! Viciè, scètate!...
VINCENZO (svegliandosi di soprassalto, scambia Nicola per un intruso e fa per cacciarlo): Chi è? Nun putite passà!
NICOLA (adirato): Puòzze sculà! Chillu primma li ffa trasì e po’ dice che nun ponno passà! (A Celestino e Eugenio:) Signori, scusate... sul palcoscenico non si può stare! (A Celestino:) Voi chi siete?
CELESTINO (altero): Io sono il marchesino Sparice!
NICOLA: Me fa tanto piacere! E che volete?
CELESTINO Niente! Sono venuto a trovà la nnammurata mia!
NICOLA: E già, chill’è trasuto dinto a la casa soja! (Alle ragazze:) Piccerè, v’aggiu ditto tanta vote che sul palcoscenico nun voglio a nisciuno, càttera!
AMELIA: Eh! Vuje comme v’ammuinate? Comme fossero trasute sta quarantina de persone!
NICOLA: E tu quaranta ne vulive? Manco miezo! S’ha da fà chello che s’ha da fà, capite?
EUGENIO: Signor impresario, se è per me, lo dica francamente!
NICOLA: Caro tenente, scusate... non e per voi... è un ordine generale!
EUGENIO: Ah, non è per me? E per l’imbecille?... Io se gli ho risposto è stato perché mi ha provocato! (Ad Amelia:) Ma noi altri militari, quella gente lì sai dove l’abbiamo?
EUGENIO: Sulla punta... degli stivali!... (Via con Amelia ridendo, per il fondo.)
CELESTINO: Ah! Per la divisa!... E lèvate nu poco la sciabola e po’ vide!... (A Nicola:) Io se vengo vengo per fini diretti!
NICOLA: O dirette o stuorte, a me nun me ne mporta niente! Ccà nun avita venì! (Alle ragazze:) Piccerè, jate addo lo trovarobe, faciteve dà li campanielle ch’avita purtà mmano pe lo primmo coro... Jate... jate! Amelia addò stà?
ELVIRA: Se n’è ghiuta dinto cu D. Eugenio!
NICOLA: E bravo! Pare che l’aggiu pregata... Facite ambressa. Jate!
CARMELA: Marchesì, stateve buono.
CELESTINO: Ci vediamo dopo la rappresentazione!
CELESTINO: ...e già!... (Le donne escono per il fondo, ridendo.)
NICOLA (a Celestino): Dopo la rappresentazione, venite, trasite, ascite, facite chello che vulite vuje!... Ma mò, no!... Embè...
CELESTINO: ...e già!...
NICOLA: Io capisco... Vuje, comme nnammurato, la vulisseve tené sempe vicino, ma qua, in palcoscenico, non si può... embè...
CELESTINO: ...e già!...
NICOLA: Pecché si no sapite che succede? Che comme trasite vuje, vonno trasì ll’ate... embè...
CELESTINO: ...e già!...
NICOLA: Io po’ ch’aggia fà?... Aggia piglià la nnammurata vosta e l’aggia caccià... embè...
CELESTINO: ...e già!...
NICOLA: (Vì comme simme belle tutte e dduje!...) Perciò faciteme lo piacere, jatevenne!
CELESTINO: Oh, scusate diciteme na cosa... Io me ne vaco, va bene, perché è questo l’ordine! Ma facimmo pe nu caso che io da qua non me ne volessi andare... Vuje che faciarrisseve?
NICOLA: Ah, scusate... ch’avarria fà?... Ve pigliarria a càuce! Embè!
CELESTINO: ...e già!... (Via dalla prima a destra.)
NICOLA: Vuj vedite a me che me succede! (A Vincenzo:) Viciè, pe regola toja, dimane vaco ncoppa a lo Municipio e te ne faccio caccià!... Io nun me pozzo appiccecà co la gente! Quanno dongo n’ordine voglio essere ntiso!
VINCENZO: Ma ch’aggia fà?... Chille afforza vonno trasì!
NICOLA: Ah, afforza vonno trasì?... E mò t’acconcio io! Mò te vaco a mettere cinche lire de multa accussì te mpare! (Via appresso.)