IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
MICHELE (dalla destra. È adirato): Io chello ch’aggiu ditto lo ddico n’ati ciente vote, pecché nun me metto paura de nisciuno!
BIASE (seguendolo): Michè, io te torno a ripetere... mmesura li pparole, si no ce ncuitammo!
MICHELE: Mariuolo! Sì, mariuolo!... Io nun lo credo che ce mettiste diece lire ncoppo lo terno... Te faciste dà cinche lire a me, po’ ce mettiste na lira e quatte lire te le cchiavaste dinto a la sacca!
BIASE: Io sti ccose nun le ffaccio!
MICHELE: E pecché nun me vuliste fa vedé lo biglietto jucato.... «Lo tengo io, nun te ne ncarricà... ogge simme ricche!» Doppo asciuta la strazione, che cos’è?... «Nun avimmo pigliato niente e pe l’arraggio aggiu stracciato lo biglietto!» E pecché? Quanno se joca mpurzione lo biglietto nun se straccia mai!
BIASE: Statte zitto, nun alluccà!
MICHELE: Voglio alluccà! Mariunciello!
BIASE: Mò me chiamme n’ata vota mariunciello... e vì si la vuò fennì... Tu hai ragione che sì viecchio e io cu ttico nun me pozzo mettere... Po’ stamme ccà dinto e nun me cunviene de fà chiacchiere!
MICHELE: Tu senza che truove la scusa che sò viecchio e che stamme ccà dinto! Jesce fora e vedimmo chi è cchiù viecchio!
BIASE: Vattenne, Michè, che tu me fai ridere! Nuje si ascimmo fora, cu nu sciuscio io te votto nterra!
MICHELE: Tu cu nu sciuscio me vutte nterra?... E ghiammo!...
BIASE: Va llà vattenne... facimmo chello ch’avimma fà!... Vuje vedite lo diavolo! Tutto chesto è succieso pecché nun è asciuto niente! La semmana che trase te faccio vedé lo biglietto primma, va buono?
MICHELE: La semmana che trase te voglio dà nu càucio dinto a li rine! (Fa il gesto di dare un calcio, ma perde l’equilibrio e sta per cadere.)
BIASE: Vi pè ttè, ca vaj nterra!... (Persuasivo:) Ma viene ccà, ragiunammo nu poco. Tu haje che sta vota pè punto e punto avimmo perzo lo terno... ce sò passate e ppalle pe capa... Nuje teneveme 5, è ovè?... e chillo è asciuto 6...; teneveme 21, e chillo è asciuto 31, la decina appriesso!... Tenevemo 54... e chillo è asciuto 45... s’è avutato! Teneveme 7 e 19?... E chisto l’avimmo pigliato...
BIASE: Cioè... come si l’avesseme pigliato, pecché sò asciute in figura...: sette, è asciute sidice... pecché da 16 lèvane 9 restano sette! 19, è asciuto 39: cadenza de nove!
MICHELE: Mò te chiavo nove pacchere e faccio cadenza de 38! Vuje vedite stu mbruglione nun me vò lassa j a me!.. Bià, io sa che te dico? Damme li ssei lire meje, si no overo facimmo fà li nummere!
BIASE: Vuè li ssei lire da me? Lo credo che starrai mbniaco, Michè!
MICHELE (alterandosi di nuovo): No io nun sto mbriaco... Damme li ssej lire... mariuolo!...
BIASE (alterandosi anch’esso): E n’ata vota mariuolo?... Mò me scordo ca sì viecchio e bonanotte a li sunature!
MICHELE (gridando): Pecché, che buò fà?
RACHELE (dalla seconda a destra): Che cos’è?... Che cos’è?...
MICHELE: Signora superiora, chisto m’ha da dà sej lire!
RACHELE: Silenzio!... Neh, Bià?... E che songo sti chiacchiere ccà dinto?
BIASE: Io nce aggiu ditto, signora superiora... Chillo è isso che allucca!
RACHELE: Ma ch’è stato, se po’ appurà?
BIASE: Avita sapé che ajere ce jucajeme nu bigliettiello in porzione. Mò che cos’è?... Pecché nun è asciuto niente, vò essere turnato li denane!
MICHELE: E se capisce, pecché lo biglietto nun me lo facette vedé!
RACHELE: Silenzio! V’aggiu ditto tanta vote che qua quistioni nun se n’hanno fà. E n’ata vota che vi trovo litigando, lo faccio sapere ai superiori e ve ne faccio caccià!
RACHELE: Zitto! Vattenne dinto!
BIASE: Va bene! (Esce dalla destra scambiando segni di minaccia con Michele che lo segue.)
RACHELE (sola): Eh! Cu stu cuoco s’ha da vedé che s’ha da fà! Se joca tutto chello che s’abbusca! (Si sente rumore in camera di Felice.) Mamma mia... Nu rummore dinto a la cammera de l’organista! E chi ce po’ sta llà dinto?... Isso non po’ essere certo! (Alla porta.) Chi è che fa rummone dinta a sta cammera?
FELICE (di dentro): Sono io, sorella!
RACHELE: D. Felice?!... Possibile?... E comme ha pututo turnà accussì priesto?