SCENA QUARTA

Michele, D. Angelo e detti.

MICHELE (dalla destra, introducendo): Favorite... favorite... (A Rachele:) Madre superiò, lo frate vuosto! (Esce.)

RACHELE: Uh! Ngiulillo!

FELICE (a parte): (Vì che piacere, neh!). (Siede all’organo e di tanto in tanto ne trae degli accordi come studiando.)

ANGELO (dalla destra): Buongiorno, Rachè... Io sono venuto a parlarti di un affare interessante!

RACHELE: Primma de tutto, staj buono, frate mio?

ANGELO: Sto buono, sto buono! Collera nun me ne piglio cchiù! Ajere sera mannaje na lettera a Cesira chiena de maleparole... Nun la voglio cchiù vedé!

RACHELE: Bravo! è stato lo cielo che t’ha vuluto aiutà.... E sò state le preghiere meje!

ANGELO: Sulamente sò rimasto nu poco nguttuso che nun aggiu pututo piglià a càuce chill’autore!

FELICE (che ha sentito, abbassa la testa suila tastiera dell’organo e canta). Gloria in excelsis deo et in terra pax hominibus!...

ANGELO: Neh, Rachè... chillo justo mò ha da cantà?

RACHELE: Lassalo sta frate mio! Chillo chesto fa sempe... è nu sant’ommo! Dunque, che m’haje da dicere?

ANGELO: Devi sapere che chillu tale giuvinotto ufficiale da me raccomandato, tutto nzieme ha cagnato penziero e nun se vè nzurà cchiù!

RACHELE: Possibile? Tu che dice?

ANGELO: Eh! Nun se vò nzurà cchiù! Io nun aggiu avuto cchiù che dirle... nun sò stato capace de persuaderlo! Me dispiace sulamente che mò la guagliona è ghiuta a Roma senza cumbinà niente!

RACHELE: No, fratu mio! La guagliona sta ccà... se n’è turnata n’ata vota!

ANGELO: Veramente?

RACHELE: Già! Non appena sentette che se trattava de matrimonio facette comme a na pazza, se mettette a chiagnere e vulette turnà n’ata vota ccà! (A Felice:) Maestro, dite a mio fratello Nannina che facette quanno appuraje che s’aveva mmaretà!

FELICE (con voce alterata, alzando le braccia al cielo, ma senza voltarsi.) Uh! Cose tremende!... Cose tremende!... (Canta:) Gloria in excelsis deo...

ANGELO: Chill’organista la verità me tocca li nierve!... (Continuando il discorso:) M’è dispiaciuto però che s’è scumbinato stu matrimonio... Essa era na bella giovane... isso pure...

RACHELE: Ma io po’ dico accussì, Nannina l’ha fatto pecché non sapeva niente e pecché nun se fidava de me lassà... Ma isso po’ pecché s’è cagnato tutto nzieme?

ANGELO: S’è cagnato tutto nzieme pe causa de n’artista de teatro! Sangue de Bacco. L’avarriena abbruscià tutte quante!...

FELICE (a parte): (Puozze murì sotto a nu camion!...).

ANGELO: Aissera a lo Fondo jette in iscena n’operetta de nu stupido... na ciucciaria qualunque... (Felice pesta sull’organo.) Neh, sapete... stateve zitto... lassatece parlà!...

RACHELE: Dunque?

ANGELO: Na figliola rimpiazzaje la parte de la primma donna che se ne scappaje... na bella figliola, pe quanto m’hannu ditto, pecché io nun la putette vedé... Isso ne rimase talmente colpito, che ha deciso de nun se vulé cchiù nzurà. Io mò me l’aggiu purtato cu mmico e sta fore... sai pecché?

RACHELE: Pecché?

ANGELO: Vulevo fà l’ultimo tentativo per farlo ritornare in sé. Vulevo che tu nce avisse parlato e avisse fatto tutto lo pussibile pe capacitarlo... l’avisse fatto capì tutto lo male che fa jenne appriesso a na femmena de chesta! Insomma, in altri termini, che l’avisse cunvertito!

RACHELE: Oh! Io pe me sò pronta, te pare... Anze me fa piacere! Ah, ecco qua santarella!... Venite, venite... figlia mia benedetta!