IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
SCENA PRIMA
ROSELLA (dal fondo): Nun nce sta nisciuno. Doppo la nuttata de stanotte starranno durmenno ancora. Mamma mia e che gente, manco la notte stanno cujeto.
MICHELE (dalla scena): Guè, Rusè, che d’è?
ROSELLA: So’ trasuta pe doje cose, primma, pe dì a lo signore che stammatina è venuta na persona che se vò affittà la casa a lo primmo piano, e pò vuleva sapè comme è ghiuto a fenì l’appicceco de stanotte.
MICHELE: E ghiuto a fenì, che doppo tanta strille, doppo tante allucche, la mugliera s’è addurmuta ncoppa a na pultrona, e D. Felice lo marito s’è addormuto nterra!
ROSELLA: Vui vedite che gente stravagante. Ma pecché fanno sempe quistione?
MICHELE: E pecché... e pecché D. Felice nun s’aveva nzurà accussì priesto, e pigliarse na capricciosa, na pazza comme a chella! Tutte cosa le dà fastidio, pe niente s’attacca li nierve. Le vularria fa attaccà io li nierve!
ROSELLA: Ma tu staje da paricchie tiempo a servì cu D. Felice?
MICHELE: Uh! Nce songo da 10 anne, da che murette la mamma, e fino a l’anno passato io nun era maje nu servitore, faceva chello che vuleva io. D. Felice nun ghieva a na parte si nun se purtava a me, mangiava a tavola cu isso, durmeveme dinto a uno lietto, insomma io era tutto. Da n’anno a chesta parte che s’è nzurato, io nun aggio avuto cchiù pace; da che faceva tutto chello che vuleva io, mò nun pozzo arapì manco la vocca. Ma si me riesce chello che sto facenno...
ROSELLA: Che staje facenno neh! Michè?
MICHELE: Niente, niente, mò nun te lo pozzo dicere! Vattenne mò ca si esce chell’arpia de la mugliera, siente li strille.
ROSELLA: Si dice buono, allora traso, a n’auto poco, pe sapè che risposta vonno dà a chillo signore che se vò affittà la casa. Statte buono. (Via pel fondo.)
MICHELE: Mò vedimmo si arrivo a chello che dich’io. Tanto fuoco aggia mettere, tanta cose aggia fà, fino a che D. Felice se sparte co la mugliera. (Dalla strada si sente suonare un tamburo, una cassa e piatti, con grande fracasso.) Ah! Eccoli ccà, so’ venute. (Corre alla finestra.) Jamme, belli figliù, ncasate la mano, forte... (Viene avanti.) A chiste le dongo meza lira a lo juorno pe le fà sunà cà sotto... mò vedimmo si nce riesco. (Di nuovo cassa, piatti e tamburo.)