SCENA SECONDA

Gaetano e detto, poi Direttore.

GAETANO (dal fondo correndo): Neh! Pascà, Emma è venuta?

PASQUALE: No ancora.

GAETANO: Meglio accussì, pecché l’aggia dà na brutta notizia.

PASQUALE: Che notizia?

GAETANO: Chella vuleva essere affittata na casa loco vicino, sono andato dal proprietario, e non c’è stato modo de puterla avè. Nu marito e na mugliera duje pazze, c’aggia fà? Io ho fatto tutto il possibile, quanno nun ha potuto essere. Ma io aggio penzato, mò le scrivo nu biglietto, e quanno vene nce lo daie. Tiene nu fuglietto e na busta?

PASQUALE: Ncoppa a chillo tavolino nce sta tutte cosa.

GAETANO (siede al tavolino e scrive): “Mia bella Emma, ho fatto tutto il possibile per fittare la casa, ma non ci sono riuscito. Spero che sarò da te compatito. Stasera ci rivedremo. Ama sempre il tuo eterno Gaetanuzzo”.

PASQUALE: (Gaetanuzzo? Gaetanone!).

GAETANO (legge sotto la lettera, quando arriva alla parola “compatito” s’arresta): Ma si la capa nun nce stà...

PASQUALE: Ch’è stato neh. D. Gaetà?

GAETANO: Invece de compatito, aggio fatto... compatate.

PASQUALE: So’ bone, chella se fà a nzalata.

GAETANO: Basta, mò nce lo dico a voce, e che diavolo, ma ha da mangià. (Getta la lettera a terra presso il tavolo.) Dimme na cosa, Pascà. Emma quant’ato tiempo pò tricà?

PASQUALE: Eh, io credo ch’è prossima a venì, pecché a n’atu poco accummencia lo cuncierto.

GAETANO: Allora mò sa che faccio? Torno a n’atu quarto d’ora; Pascà, me faje lo piacere de dirle che nun è stata colpa mia, pecché so’ ghiuto là cu li denare mmane, e nun n’aggio cacciato niente.

PASQUALE: Va bene, ve servo.

GAETANO: Tiene, Pascà, pigliate li sigari.

PASQUALE: Oh! Lasciate sta...

GAETANO: Nonsignore, te l’haje da piglià, tiene. (Gli dà un soldo e va.)

PASQUALE: Grazie. (Poi guardando la moneta:) Vì comm’è splendido! Pigliate le sigari, e me mette nu soldo mmano! (Via in fondo e guarda.) Ah! ah! ah!... Vì comm’è curiuso!... A chell’età pretende de fà ammore. Chillo, mò che esce da lo teatro, nu colpo de viento lo mena pe ll’aria.

DIRETTORE (con orecchino in mano): Pascà?

PASQUALE: Comandate?

DIRETTORE: S’è truvato stu ricchino dinto a lo curreturo de la prima fila, l’avetta perdere quacche signora aieressera. Si te lo venene a cercà, te faje dicere comm’è fatto, e nce lo daje.

PASQUALE: Va bene nun dubitate. (Prende l’orecchino.)

DIRETTORE (alla porta delle comparse): Giovinò, facite priesto.

PASQUALE: Lo cuncierto è accumminciato?

DIRETTORE: Mò se sta pruvanno la mimica, doppo se provene li ballabile, e all’ultimo se provene le scene. Specialmente la scena dell’Inferno ch’è bella assaje, nce stanno cierti mostri cu tanta na capa!

PASQUALE: Vularria proprio vedè la scena quanno cade a neve.

DIRETTORE: Ah! Chella è na bellezza. (Via nel palcoscenico.)

PASQUALE: Vì che bello sciucquaglio, va trova chi l’ha perduto. (Prende la carta che ha gettato Gaetano.) Mettimmolo dinto a sta carta. (L’avvolge e se lo mette in tasca.)