IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
SCENA PRIMA
Usciere, accomodando le sedie, poi Raffaele.
USCIERE: E chesta è n’ata jurnata, mò vide che pure a le 5 nce ne jamme. Me so’ proprio seccato de fà l’usciere.
RAFFAELE (veste con grosso soprabito nero, colli alti e grossa cravatta nera. Cappello a cilindro, guanti di lana color pignuoli. Entra frettoloso): Guè, Giacomì, staje ccà.
USCIERE: Servo vostro, Eccellenza.
RAFFAELE: Sta na folla fore, che nun se pò passà.
USCIERE: Eccellenza, l’avite fatta nu poco tarde stammatina?
RAFFAELE: Lasceme sta, Giacomì, tengo la capa ca me va pe ll’aria. Stanotte aggio fatto na nuttata chiara chiara, io e quella povera infelice di mia moglie.
RAFFAELE: Addò... so 3 ghiuorne che tene li delure, na casa revutata... stongo cu nu pensiero che non ti puoi credere. Fra le altre cose tengo 7 figlie femmene, nun aggio potuto avè maje nu mascolo, ti assicuro che me sentarrie currivo assaje si facesse n’ata femmena. Mò l’aggio rimasto cu li delure, stanno tutte li pariente a casa.
USCIERE: E lassate fà a lo Cielo, pò essere c’avite na bona nutizia.
RAFFAELE: Aggio rimasto ditto a la serva che appena muglierema figlia, me lo venesse a dì, e me facesse sapè si è masco lo, o è femmena. Si è femmena Giacomì, parola d’onore, te la regalo a te!
USCIERE: (E sì, l’ha pigliata pe na cacciutella). Signò, jatevenne, che dicite...
RAFFAELE: Tu mò me cride, io sto ncoppa a li spine, me ne vurria turnà la casa.
USCIERE: Eccellenza, vuje pazziate, ogge s’ha da fà la causa de D. Felice Sciosciammocca, che se vò spartere de la mugliera.
RAFFAELE: Ah! Già, haje ragione, che vuò da me, nun nce aveva pensato. Và, lasseme cagnà sta cammisa che pe correre stongo una zuppa. (Ra. poi torna.) Neh! Giacomì, che dici, faje che fà, lo mascolo?
USCIERE: E io che ne saccio, accussì sperammo.
RAFFAELE: Che diavolo!... Avarria fà n’ata femmena. E questa sarebbe una disdetta, una disdetta! (Via nella porticina in fondo a sinistra.)
USCIERE: Ah! Ah! Ah!... Cheste so’ cose proprio curiose.