IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
SCENA PRIMA
Achille, poi Salvatore e Michelina.
ACHILLE (dal fondo): Sangue de Bacco, nun me so’ visto maje tanto mbrugliato quanto me veco stanotte. Comme se pò abbattere stu locale cu duje cammariere, io, e Vicienzo. Lo senzale aveva prommiso lo patrone che stanotte avarria marinate duje cammariere de rinforzo, lo fatto sta fino a mò nun se so’ viste ancora. (Le due maschere da diavoli viano pel fondo, escono Salvatore e Michelina. Salvatore da pagliaccio e Michelina in domino rosa col mascherino in mano.)
SALVATORE: Giovinò, bonasera, tiene na tavolella pulita pe nce magnà nu muorzo cuiete cuiete?
ACHILLE: (Chisto è venuto abbascio Puorto). Ho capito, volete una camera separata.
SALVATORE (a Michelina): Ch’ha ditto? Na carta senapata?
ACHILLE: Una camera separata, voi forse non ci sentite bene.
SALVATORE: No, io nce sento buono, giovinò, e parle comme haje da parlà, si no te chiavo nu cuppino de pasta!
ACHILLE: (Vuje vedite che me succede, è meglio che me stongo zitto, cheste nun sogno nottate de fà chiacchiere). Dunque la camera sarebbe quella là. (Indica seconda porta a destra.)
SALVATORE: Bravo! E dimme na cosa, che nce potimmo magnà?
ACHILLE: Tutto quello che volete voi, qui c’è tutto.
SALVATORE: Michelì, che t’aggradesce?
MICHELINA: Chello che buò tu Salvatò, ma non tanta rrobba, pecché tengo poco appetito. (Di d. si sente un campanello.)
ACHILLE: Eccomi... permettete nu momento, mentre penzate, io mò vengo. (Via nella prima porta a destra.)
SALVATORE: Mò nce facimmo purtà quatte vruoccole a la nzalata, quatte fecatielle de puorco, nu bicchiere de vino, e tirateve la porta!
MICHELINA: Sì, dice buono Salvatò, una cosa, spicciammoce priesto, pecché la patrona co lo marito pure lo veglione so’ venute, e nun me vularria fà vedé, capisce.
SALVATORE: Quanno staje cu mmico, nisciuno te pò dicere niente.
ACHILLE (uscendo con piatti in mano e bottiglia vuota): Eccomi qua. Avete pensato?
SALVATORE: Sissignore. Vulimmo quatte vruoccole e la nzalata, e quatte fecatielle de puorco.
ACHILLE: (Io l’aggio ditto che chisto l’ha pigliata pe taverna). Scusate signò, fecatielle non ne abbiamo.
SALVATORE: Avite ditto che teniveve tutte cose.
ACHILLE: Tutto, tranne questi cibi ordinarii, vuje me potiveve cercà pure na zuppa de zoffritto, e a me chi me la deva.
SALVATORE: Giovinò, nun fà lo curiuso. Allora che nce può dà?
ACHILLE: Volete due cervellatine?
SALVATORE: Che cervellatine, so’ troppo leggiere, portace li saciccie.
ACHILLE: Va bene, li saciccie, favorite, che mò ve servo.
SALVATORE: Chello che te prego fà ampressa. (Viano nel n. 3.)
ACHILLE: Da dò è asciuto stu lazzarone. (Campanello di dentro.) Eccomi, eccomi. Cielo mio fà venì li cammariere. (Via pel fondo.)