SCENA QUINTA

Errico, poi Salvatore, poi Felice e Amelia, poi Achille.

ERRICO: Voi vedete la combinazione, è venuto nu svenimento a D. Carlo, e non si trova mezzo come farlo rinvenire, se si potesse avere un medico. (Via pel fondo a sinistra.)

SALVATORE: Guè, io tuzzuleo, vene uno che me pareva nu guardaporta, le dico portatece li saciccie, chillo senza parlà piglia, e se ne fuje... e ma pecché se n’è fujuto? Guè, ccà overo m’hanno pigliato pe scemo! (Alla porta.) Michelì, agge pacienzia, aspetta nu momento ca mò vengo. Si trovo a chill’ato cammariere lo ntorzo de mazzate! (Via pel fondo a sinistra.)

FELICE (dal fondo a destra con Amelia): Venite Donna Amè... ma io non capisco che paura avete.

AMELIA (in domino nero e mascherino): Jatevenne D. Felì, si sapeva che nce steva chesta folla, nun nce sana venuta.

FELICE: Che nce ne importa de la folla.

AMELIA: Eh, che nce ne importa, va trova quanta gente nce hanno viste.

FELICE: Nonsignore, vi posso assicurare che nc’ha visto nisciuno... faciteme lo piacere, levateve nu poco la maschenina, lasciatemi vedere quella bella faccia.

AMELIA: No, scusate, nuje avimmo fatto lo patto ca lo maschenino non me l’avarria maje levato.

FELICE: è giusto, io mi sto ai patti, ma nu poco poco...

AMELIA: D. Felì, nun accomminciate, si no ve lasso e me ne vaco.

FELICE: No, voi che dite!

ACHILLE: E chist’ato cammariere è pure n’ato arrunzone! I signori comandano qualche cosa?

FELICE: Si, una stanzetta separata, e una cenetta stuzzicarte.

ACHILLE: Ho capito. La stanza è questa... (Mostra il n. 1) vedete se vi piace.

FELICE (guardando): Sissignore, è bellissima. (Ad Amelia:) Trasite e aspettateme che io mò vengo, quanto ordino la cena. Nun ve muvite da lloco dinto. (Amelia entra nel n. 1.)

ACHILLE: Dunque che comandate?

FELICE: Cammariè, due buone bistecche con salza piccante, nu buono fritto de pesce, nu spezzato de pollo, e qualche altra cosarella a piacere tuo, quello che ti raccomando le ostriche e lo sciampagna.

ACHILLE: Va bene, saccio io comme v’aggia servì. ( Via pel fondo a destra.)

FELICE: Sangue de Bacco, finalmente aggio fatto lo colpo, so’ nu grand’ommo. Va trova de Donna Virginia che ne sarà succieso. Io l’aggio ditto v’aspetto mmiezo a li grade... eh, steva fresca, io so’ ghiuto a truvà Donna Amelia che me premeva cchiù assaje.