SCENA SECONDA

Menechella e detto, poi Dorotea.

MENECHELLA: Aggio posto li buttune a lo gilè.

FELICE: Mille grazie. (Con tuono.) Uscite.

MENECHELLA: Uscite nu cuorno! Dinto a la sacca de la giacchetta nce stevene sti 8 ritratte (li mostra) de chi songo?

FELICE: (Li ritratti de li ballarine!). Questi sono ritratti.., che io ci studio sopra, siccome studio lo disegno, ogne ghiuorno me ne faccio uno co la pastella.

MENECHELLA: Ah! Te lo faje co la pastetta, te lo faje...

FELICE: No, mò faccio fritto! bestia, co la pastella, lo disegno a grandezza naturale.

MENECHELLA: No, no, mun me l’ammucche!

FELICE: E nun te l’ammuccà.

MENECHELLA: Chelli llà so’ tutte nnammurate toje.

FELICE: Oh, saje, a le corte; con questo tu, tu e tu, me staje seccando bastantamente, tu sei una serva e sta al tuo posto.

MENECHELLA: Ah, mò te dongo nu schiaffo, guè se veste pure de carattere, doppo 2 anne che m’è venuto appriesso... Ah! Quanto me trovo pentita che chella sera te dette chillo bacio fora la loggia.

FELICE (serio): Se voi mi daste un bacio, io ve ne dette 3, me ne dovete dare altri due.

MENECHELLA: Te voglio dà duje cauce. (Fa l’azione.)

DOROTEA (d.d.): Tetillo, Tetillo.

FELICE: All’arma de mammeta, mammà che vene, mò te trove ccà!

MENECHELLA: E comme faccio, aspetta. (Dalla sacca prende un colletto bianco, e con l’ago si mette a cucire seduta, discosta da Felice.)

DOROTEA (entra, si ferma sotto la porta guardando intorno, Felice ha preso un libro e s’è messo a leggere): (Menechella ccà dinto). Che staje facemmo ccà, Menechè?

MENECHELLA: M’ha chiammata lo signorino pe me fa mettere cierti punte a stu cuollo.

DOROTEA (guardando): E che d’è, co lo cuttone niro accuonce lo cuollo janco.

FELICE: (All’arma de mammeta mò me vò fa passà nu guaio a me!).

MENECHELLA: Avite ragione, signò, mun nce aveva badato, mò vaco abbascio e piglio lo cuttone janco. (Pe mezzo sujo, ma l’aggia fa na mazziata comme dico io.) (Via fondo.)

DOROTEA: (Sta Menechella me fa stà mpensiero). Siente, Tetì. (Guardandolo:) E che faje liegge co lo libro sotto e ncoppa?

FELICE: Sì, mammà, steva vedemmo si puteva leggere co lo libro sotto e ncoppa. (Vuje vedite lo diavolo!)

DOROTEA: Dunche, io te voglio dicere che tu nun sì chiù nu guaglione... da oggi in avarte, quanno t’haje da fà acconcià quacche cosa, dimmelo a me, penso io a dirlo a Menechella... non è cosa regolare che na figliola trasesse sempre dinto a na cammera de nu giovinotto quale si tu.

FELICE (ingenuamente): Mammà, e che nce sta quacche cosa de male?

DOROTEA: Male no, ma... (Quanto è innocente!)

FELICE: Allora aggia dì a Menechella che nun nce venesse chiù?

DOROTEA: Me ne incarico io.

FELICE: (Accussì me la levo da tuorno).

DOROTEA: Ma Lorenzo addò sta? M’haje ditto che ascive cu isso?

FELICE: Me vene a piglià chiù tarde, pecché io l’aggio ditto che nun vuleva perdere la lezione, doppo fatto lezione, nce vaco.

DOROTEA: (Che figlio, che figlio! io dico che pe tutto lo munno, nun se trova nu figlio comm’a chisto!).