SCENA PRIMA

Dorotea e Menechella, poi Attanasio.

DOROTEA: Dunche Menechè, nce simmo capito, io nun voglio che tu vaje cchiù ncoppa a lo quartino de Tetillo.

MENECHELLA: Signora mia, io si nce jeva, era sempe pe fa quacche servizio, quacche vota me nce avite mannata vuje stessa, ma maje pe quacche pensiero; me me sarrìa guardata bene.

DOROTEA: No, nun già pe te, ma saje, chillo è piccerillo, tu sì figliulella, e l’esca vicino lo fuoco s’appiccia.

MENECHELLA: Allora cara signora, è meglio che D. Feliciello lo levate da là ncoppa.

DOROTEA: E pecché?! Chillo è lo studio.

MENECHELLA: Vuje quà studio... là nce vanno figliole a meglio a meglio.

DOROTEA: Figliole!

MENECHELLA: Figliole, già.

DOROTEA: E pe dò trasene?

MENECHELLA: Quanmo n’ommo vò fà trasì ma femmena, doppo che stanno tutte le porte chiuse, trova sempe lo mezzo pe farla trasì... Signò, a le corte, avita sapè che aiere vuje me mannasteve ncoppa co la biancheria de lo figlio vuosto, io nce la purtaje e nce la vuleva mettere, comme lo soleto, dinto a la cammera de lietto, vaco p’arapì la porta, e chi me veco venì de faccia? Doje femmene!

DOROTEA: Possibile!

MENECHELLA: Una castagna, e l’ata nera... io accuminciaje alluccà... una se ne fujette, e credo ch’aveva essere la nmammurata de D. Feliciello, l’ata rummanette pe me persuadè e accussì nun farme chiù strillà... mentre steveme parlammo... indovinate chi trasette?

DOROTEA: Chi?

MENECHELLA: D. Lorenzo, lo marito de D. Amalia.., signora mia, chello che mò ve dico, vuje nun ve lo putite mai immaginà... Nientemeno, chella tale ch’era rimasta a parlà cu mmico era la nnammurata de D. Lorenzo!

DOROTEA: Che?

MENECHELLA: So’ cose da stravedè... n’ommo nzurato, cu chella mugliera vicino... Sciù, pe la faccia soja!

DOROTEA: Uh! E comme se fa?... Chisto è nu guaio!

MENECHELLA: Pò ajere lo guardaporta, me chiammaje e me dicette: Menechè, dà sta lettera a lo signorino, poco primma l’ha purtata na figliola e se n’è ghiuta — io me pigliaje la lettera, e la purtaje a leggere a lo maestro —...che saccio, chillo appena la liggette, se facette afferrà cierti dulure ncuorpo che me pareva nu cane... zumpava, curreva, me pareva nu pazzo!

DOROTEA: E pecché?

MENECHELLA: E chi ne sape niente.

DOROTEA: Uh! Chisto è nu guaio gruosso assaie... chillo è na criatura... Na capa allerta de chesta sarrìa capace de me lo guastà.

MENECHELLA: Sicuro, chelle ve lo guastano. Signò, nun dicite niente de chello che v’aggio ditto a D. Lorenzo, che io nun me voglio ncuità.

DOROTEA: No, nun avè appaura, che a te nun t’annommeno... have ragione chella povera figlia d’Amalia.

MENECHELLA: Signò, io vaco dinto, si me vulite me chiammate. Uh! Signò, vene lo patrone. (Via fondo.)

DOROTEA: E chisto che nun se n’incarrica, vedite che razze de patre stanne ncoppa a la terra.

ATTANASIO: Dorotè, io vaco abbascio a lo ciardino a fumarme sta pippa. (Fumando per andare.)

DOROTEA: Io me vaco a fumà sta pippa abbascio a lo giardino. (Beffandolo.) Addò vaje, Cicco Bacco! Ccà nce avimma dà da fà, p’arreparà a nu guaio!

ATTANASIO: Nu guaio! Che guaio?

DOROTEA: Tetillo, fà l’amore!

ATTANASIO: Eh, nun sapeva ch’era... chisto è lo guaio?

DOROTEA: E tu cride che sia na cosa de niente?

ATTANASIO: Non è na cosa de niente, ma manco nu guaio è. E pò, io saccio tutte cose, stammatina lo maestro me l’ha ditto... (ridendo) e la nnammurata de Feliciello sai chi è?

DOROTEA: Chi è?

ATTANASIO: è la mugliera de lo maestro.

DOROTEA (coprendosi il volto con le mani): Uh! Mamma mia che scuorno! E isso comme l’ha saputo?

ATTANASIO: Che saccio, l’è capitato dinto a li mmane na lettera co la mugliera mannava a Feliciello.

DOROTEA: Forse sarrà la lettera che n’ha ditto Menechella.

ATTANASIO: Già, Menechella nce la purtaje a leggere. E chell’ata castagna va trova chi era?

DOROTEA: Nce sta pure na castagna?

ATTANASIO: Già, fuje trovata ajere ncoppa a lo quartino de Tetillo. No, Tetillo nun se porta niente male.

DOROTEA: Pe causa toja che nun haje voluto fà maje lo patre, ma sà che te dico, che si da oggi in poi, nun faje lo patre comme l’haje da fà, nte metto sotto, e te li cunsegno. (Via a destra.)

ATTANASIO: Vuje vedite chillo tramme a vapore che vò da a me... chillo alla fine è guaglione, vede ma figliola e se ne va de capo... songh’io, a chesta età, eppure venene cierti momenti...