SCENA SETTIMA

Errico e detti, poi Peppino e Michele, indi Concettella.

ERRICO (esce ridendo): Io mò moro da la risa, mò me vene ne cosa!

FELICE: Che beco! Errico! Aggio capito.

PASQUALE: E buje pecché redite?

PASQUALE: Chillo v’ha cuffiato, l’ha fatto apposta pe fà na pazzia co mmico, nuje simme amice, dincello, puozze passà no guajo!

ERRICO (ridendo): Sissignore, siccomme me n’ha fatto tante a me, io mò nce n’aggio fatto una a isso.

FELICE: Puozze sculà!

PASQUALE: E non è overo che è nzurato?

ERRICO: Nonsignore, e la lettera che avite ricevuta da mio zio il Deputato, è stata dettata da me, pe le fà n’aula pazzia.

PASQUALE: Aggio capito. E voi siete nipote al Deputato?

ERRICO: Sissignore.

FELICE: E che nce steva scritto dinto a chella lettera?

PASQUALE (ridendo): Lo bolite sapé? E leggite. (Gli dà la lettera del primo atto.)

FELICE (leggendola).

IGNAZIO (ridendo): Veramente è stata na pazzia no poco spinta.

ERRICO: Vuje che dicite! Chillo na vota me fece perdere 30 mila ducale!

FELICE (che ha letto): Chillo apposta m’ha vestuto accussì... Mannaggia all’arma de mammeta, aggio capito tutte cose; ma cheste non so’ pazzie che se fanno, agge pacienza.

CONCETTELLA: Patrò, lo guardaporta ha sagliuto sti duje telegramme. (Li dà.)

PASQUALE: Ah! Forse li risposte... (Apre il primo e legge:) Mio passato impiegato Felice Sciosciammocca, fatto servizio militare tre anni. Ravel».

FELICE: E che c’entra questo?

PASQUALE: C’entra, perché io ho mandato a domandare a Ravel.

FELICE: Vedite che figura aggio avuto da fà co Ravel io.

PASQUALE: Vedimmo chist’auto. (Legge:) «Desiderio mio nipote fare uno scherzo, essendo amico del raccomandato, perdoniamo insieme la gioventù: Cardi». Intanto vuje pe pazzià me venite a ncuità a me.

ERRICO: Scusate D. Pascà.

PASQUALE: Va bene, non ne parlammo chiù, io per troppo rispetto a vostro zio, Io faccio stare con me in qualità di segretario, e ve dongo, comme ve dicette, ciente lire a lo mese.