SCENA PRIMA

Elvira, poi D. Peppe con 15 lire.

ELVIRA (parlando vicino alla porta a sinistra): Piccerè, spicciateve, aggiate pacienza... è n’affare serio, l’accunte so’ crisciute e io tengo doje figliole sulamente! N’aggia piglià afforza n’ata si no comme faccio? Ccà sto meglio però, dinto a li guantare teneva na misera putechella, ccà tengo camera da lavoro e salottino pe ricevere quacche signora, nce pago cchiù assaje, pacienza! Ma po’ tene altro aspetto de magazzino! Feliciello quanno vene so’ certa restarrà sorpreso. Intanto D. Peppe è asciuto da stammatina e nun vene ancora. L’aggio ditto: Venite presto che m’avita j accattà certe fettucce e chillo nun è venuto cchiù!

PEPPE: Oh! Eccomi qua a me!

ELVIRA: Finalmente D. Pè, site venuto! e che diavolo! Avite tricato assaje?

PEPPE: Io ll’aggio ditto: Mò vide comme doppo tanta fatiche quanno vaco, pure l’aggio na cancariata! Io stongo una zuppa de sudore!

ELVIRA: Basta, site stato da D.^a Mariannina?

PEPPE: Sissignore, e doppo n’ora d’anticamera è asciuta la cammerera cu 15 lire... ha ditto la signora che venite a lo 10 de lo mese!

ELVIRA: Comme, ncoppa a la 120 lire ve dà 15 lire?

PEPPE: 15 lire! Ch’aveva fà, nun me l’aveva piglià?

ELVIRA: Va bene, dateme ccà. Screvitele dinto a lo registro.

PEPPE: Me vuleva cagnà primma la cammisa.

ELVIRA: Ve la cagnate doppo. D. Pè, nu poco de pacienza!

PEPPE: E và bene! (Scrive nel registro.) Signora Mariannina Pepierno in conto L. 15.

ELVIRA: Da D.^a Elena nce site stato?

PEPPE: Gnorsì, ma nun l’aggio trovata, steva sulo D. Procopio lo marito, arraggiato comme a nu cane, pecché la mugliera ancora savveva ritirà. Ha ditto: Jatevenne, che mò vengo io a lo magazzino.

ELVIRA: E che vene a fà?

PEPPE: E che ne saccio!

ELVIRA: E da D.^a Angelica nce site juto?

PEPPE: Chella canchera de vecchia è stata che m’ha fatto perdere cchiù tiempo! Siccome ogge è la nascita soja, e stasera dà na gran festa de ballo, s’ha misurato 4 o 5 vote le veste, e vuleva sapé da me quà le steva meglio; io diceva sempe che steva bene, finalmente ll’aggio dato la nota, essa se l’ha pigliato e m’ha ditto: Va bene, dite a la principala che siccome ll’aggia parlà, cchiù tarde vaco io da essa!

ELVIRA: E bravo! Insomma de tutte l’esigenze, ch’avite fatto, 15 lire?

PEPPE: E ch’aggia fà; vuje site curiosa!

ELVIRA: Basta jate dintù a li guantare da D. Giovannino, e faciteve dà 3 canne de fettuccia de seta larga 3 dita, na canna rossa, na canna verde e na canna bianca, tenite a mente?

PEPPE: Ma io me vuleva cagnà la cammisa!

ELVIRA: Ma è impossibile! Mò nun ve putite cagnà, jate primma a fà lo servizio, e facite ambressa, pecché avita fà chillo conto dinto a lo registro che sta sospeso da ieri.

PEPPE: Va bene! Mò sà che catarro che piglio! (Via pel fondo.)

ELVIRA: Eh! assolutamente stu D. Peppe non è cosa cchiù! S’è fatto troppo viecchio! Ah! quanno me sposo è n’ata cosa... chill’è n’agrillo, esce da dinto a lo fuoco. Ch’aggia fà, io mò tanto de lo piacere sto faticanno pe me fà lo corredo a vinte a vinte! (Via.)