IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
FELICE (con paglia rotta): Aggio fatto fermà la carrozza cu tutte quante dinto, aggio visto na tabella vicino a lo barcone: Mode e cappelli. Cielo mio, famme truvà na paglia comme a chesta, si no comme faccio?
ELVIRA (voltandosi): Che beco! Feliciello!
FELICE: (Elvira ccà! Aggio passato lo guaio!)
ELVIRA: Guè, Feliciè, ched’è? Staje buono? Te sì rimesso finalmente?
FELICE: No, non ancora, c’è sempre qualche traccia. (Si gratta.) Te voglio troppo bene!... Eh! nun t’accostà!
ELVIRA: Uh! Mamma mia, ma comme nun te sì guarito perfettamente?
FELICE: Vulesse lo Cielo, aggia fà ancora na quinnicina di giorni di cura... parlammo da lontano. Tu comme staje ccà?
ELVIRA: E comme, lo patrone de casa tujo nun te l’ha ditto? Io mò sto sola, nun sto cchiù cu chella compagnia mia, so’ 8 juorne che sto ccà, io t’aggio rimasto la mmasciata ncoppa a la casa toja.
FELICE: Ah! Sicuro, io saccio tutto e pecchesto so’ venuto, me songo susuto da dinto a lo lietto pe disperazione, nun me fidavo cchiù!...
ELVIRA: E pecché, và te cocca, chesto te pò fa cchiù male!
FELICE: Si, mò me ne vaco da ccà, ma primma t’aggia dicere na cosa.
ELVIRA: Che cosa?
FELICE: Famme la carità, vide si tiene na paglia comme a chesta!
ELVIRA: Na paglia comme a chesta, e pe chi serve?
FELICE: Serve pe na zia mia, la quale è ricchissima, ed è una stravagante di prim’ordine; e siccome ajere lo cane se la pigliaie mmocca, e ce la rumpette tutta quanta, essa m’ha ditto che se io riesco a trovarle la stessa paglia, fa lo testamiento a favore mio!
ELVIRA: Veramente? Feliciè, dì la verità, servesse pe quacche figliola?
FELICE: Che figliola? Serve pe ziema, te lo giuro.
ELVIRA: Tu vuò bene sulo a me?
ELVIRA: Feliciello mio!
FELICE: Vide se tiene sta paglia!
ELVIRA: Jammo dinto, confrontammela cu chelle che tengo.
FELICE: Oh! Io ti ringrazio Elvira mia... Elvira mia cara... Eh! nun t’accostà! (Lazzi del grattare e viano a sinistra.)