IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
ATTO TERZO
SCENA PRIMA All’alzarsi della tela Ignazio dorme. Campanello di dentro, poi Ignazio e Elena.
I link alle concordanze si evidenziano comunque al passaggio
SCENA PRIMA
All’alzarsi della tela Ignazio dorme. Campanello di dentro, poi Ignazio e Elena.
IGNAZIO: Chi è, neh! Uh! Stanno tuzzolianno. (Esce ed entra con Elena.) Scusate signò!
ELENA (con paglia in testa): Ma che sì nzurduto? So’ 10 minute che sto tozzolianno.
IGNAZIO: Aggiate pacienza signò, m’era addormuto nu poco, si sapisseve che ghiurnata aggio passata!
IGNAZIO: Poco primma disperato che nun v’aveva potuto truvà a nisciuna parte ha ditto: Mò faccio l’ultimo tentativo, vaco a vedè dinto a la villa chi sà stesse passianno cu quaccheduno, me vuleva purtà pure a me, ma io nun me so’ fidato a la verità, aggio ditto: Jate, signò, che io v’aspetto ccà.
ELENA: Jeva a passià dinto a la villa cu quaccheduno? E pe chi m’aveva pigliata a me? Mò che vene, lo voglio acconcià io!
IGNAZIO: (Mò have lo riesto appriesso!). Nuje simme jute vedenno pe tutte parte, e nun v’avimmo potuto truvà, ma addò site juta, neh signò?
ELENA: Io nun l’aggia dicere a te addò so’ gghiuta... sono affari che a te non ti riguardano.
IGNAZIO: Scusate, signò... (Guè, se nfoca pure sà!)
IGNAZIO: Nonsignore, e che mangiavamo... ccà nun ce se penza cchiù. Poco primma quanno nce simmo ritirate, lo signore è trasuto dinto a la trattoria a lo puntone e ha ordinato lo pranzo pe n’ati 3 quarte d’ora.
ELENA: Ah! Ha ordinato lo pranzo pe n’ati 3 quarte d’ora?
IGNAZIO: Nonsignore pe 3. Io, vuje e isso, e ve pare non ordinava lo mangià pe buje, chillo si sapisseve comme sta? Me pare nu pazzo! Io mò vularria che venesse, puveriello, nun s’ha pigliato manco a lo cafè stammatina, faceva mille pensiere, mille castielle in aria, e io nce lo diceva: Nun avite appaura, signò, quacche disgrazia se sarrà data. Niente, niente, va trova addò è gghiuta, mò che vene voglio fà, voglio dì! Ma io pò conosco lo carattere, chillo mò che ve vede lle passa tutto cose, io aggio miso pure la tavola, magnanno magnanno vedite che facite pace.
ELENA: Va buono, vattenne dinto.
IGNAZIO: Subito. (Me putesse arrepusà nu poco!) (Via a sinistra.)
ELENA: Sto ccà e nun lo credo, aggio truvata sta paglia tale e quale a la mia, e nun saccio comme! Chillo è stato lo Cielo che m’ha voluto aiutà! Mentre steva ncoppa addò D. Felice, dinta a la cammera de chella figliola aggio visto na scatola, ll’aggio aperta, e da dinto nce aggio truvata la paglia tale e quale comme la mia! Cose proprio diaboliche, cose da fà ascì pazzo! Io senza perdere tiempo me l’aggio pigliata e me ne so’ gghiuta. Cesare m’è venuto appriesso, ma io l’aggio fatto n’asciuta de quarto mmiezo e la via, che certo s’è pigliato collera. Sperammo che nun me ncuitasse cchiù! (Campanello di d.) Chisto è Procopio, ccà nce vò coraggio, si m’avvilisco è peggio! (Chiamando:) Ignazio? Ignazio?