SCENA PRIMA

Luisella, poi Rosa.

LUISELLA (è presso il finestrino in fondo e cerca di scacciare il cane con un lungo piumino da spolverare): Passa llà... passa llà... Mannaggia ll’arma de mammeta, vì comme è seccante stu cane! Ogni tanto caccia la capa da dinto a stu fenestiello e se mette a alluccà! Nce aggiu ditto tanta vote a lo ciardeniere... va a fenì ca nu juorno de chiste lle mengo nu poco de spogna fritta e lo faccio murì! Passa llà!... Ah! Se n’è gghiuto!... Pe causa de stu diavolo de cane D. Celestino, lo nepote de D. Michele, quanno vene quacche vota subeto se ne va... pecché lo sente e se mette paura!... Ma quanto è simpatico chillu guaglione! Che bell’uocchie che tene!... Peccato ch’è nu turzo de carcioffola... nun capisce niente... nun è buono proprio a niente!...

ROSA (di dentro a sinistra): Luisella!... Luisella!... (Esce.)

LUISELLA: Comandate, Signò!

ROSA: Feliciello nun s’è retirato ancora?

LUISELLA: Nonsignore.

ROSA: E bravo!... A li cinche e mmeza ancora s’adda retirà... Io vularria sapé proprio che va facenno!... Mò che vvene te faccio sentì!...

LUISELLA: Signò, scusate che ve dico na cosa... Vuje mò v’avita piglià sempe collera cu stu marito vuosto? Ma de chesta manera cadite malata!

ROSA: È meglio... è meglio che cado malata... è meglio che moro, pecché io chesta vita nun la pozzo fà! Io nun m’aveva mmaretà n’ata vota, pecché nu marito comme a chillo aveva capì che nun lo truvavo! Teneva diece anne cchiù de me... sì... chesto è overo... ma me vuleva bene però, steva sempe vicino a me... mentre chistu ccà me va fujenno sempe! E io... vedete che cos’è la donna... io a chillo nun lo putevo vedé e pe chisto tengo tanta premura che m’ha fatto perdere la pace!..

LUISELLA: Se capisce... pecché chistu pò è chhiù giovene assaje de vuje... è simpatico... aggraziato...

ROSA: Cchiù giovene assaje, mò! Luisè che te cride? Tene otto anne meno e me. Io ne tengo 37 e isso 29... Sta grande differenza io nun la veco! La differenza fra me e isso sai qual è? Io so’ tutta fuoco, affezionata, amorosa, e isso è friddo e indifferente!

LUISELLA: Ma nonsignore, signo... chesto ve lo credite vuje... Io saccio che D. Felice nun fa na cosa si nun cerca primma lo permesso a vuje!

ROSA: Ah, se sape! Io da tre anne che simme spusate nun ce n’aggiu fatto piglià: l’aggiu sempe tenute li granfe ncuollo! E si no stevo fresca!... E quanno nun m’obbedisce lo faccio tremmà!

LUISELLA: Ah, facite buono!... Uh, signò, sta trasenno D.ª Concettina.