SCENA OTTAVA

Felice, 2 comparse e detti.

FELICE (con grosso cappello a tubo che gli va larghissimo, grossa sciassa e grosso buchè al petto. Le 2 comparse vestono egualmente, uno è gobbo, e 1 altro ha un occhio coperto da una benda, buchè di fiori sul petto): Eccoci qua a noi. (Tutti ridono.) Embè, ma che significa chesto? Fische da llà, resate da ccà... mò me ne vaco, nun sposo cchiù, e felicenotte! (Risate.)

BIASE: Ma ve putisseve mettere nu cappiello cchiù stritto, na sciammeria che fosse juta meglio.

PEPPINO: Eh, me pare.

FELICE: Io chesta teneva. Si ve conviene, e si no nun spusamme cchiù.

SALVATORE: Chesto è bello! Nun spusamme cchiù.

BIASE: Comme se trattasse de nu fatto serio. Me dispiace che nu galantomo comme a buje, se veste de chesta manera! Li fische c’avite vuje, l’have pure figliema, e chesto nun sta.

FELICE: Che v’aggia dicere, io nun teneva ata rrobba.

BIASE: Va bene. Chilli duje chi songo?

FELICE: So’ li testimoni.

BIASE: Comme, Alesio lo craparo, e Mineco lo nzalataro?

FELICE: E io nun teneva nisciuno, a chi aveva purtà? Si ve piacene, bene, e si no che vulite da me, nun spusamme cchiù.

SALVATORE: E chesta è na canzona.

BIASE: E mò dicite n’ata vota chesto? Nun spusate cchiù.

RUSINELLA: Ma papà, nun ve site accorto che chillo pazzea, ha fatto chesto, s’è vestuto accussì, pe nce fà ridere, pe nce fà sta allegre... e io ve dico la verità, che vestuto de chesta manera, me piace cchiù assai, m’è chiù simpatico, è na cosa nova, è na toletta capricciosa!... Jamme, mettimmece sotto a lo vraccio, quanno se vò bene a n’ommo, nun se bada a niente, qualunca cosa se mette, qualunca cosa fà, è sempe bello. (Si mette a braccetto con Felice.)

SALVATORE: Have ragione Rusina. Evviva li spuse!

TUTTI: Evviva!

ANTONIO: Musica! Musica! (La fanfara suona, tutti sfilano come in concerto. Di dentro, suono di vampane e campanelle. Sparo di botte, al secondo giro che faranno i personaggi.)

Nce steva na figliola ca di nenne

Era a cchiù cara e chiù bella guagliona,

Cianciosa, fresca aggraziata e bona

Ma de spusà nun ne vuleva sapé.

Però, sta nenna mò nc’è capitata

Ha visto ’o giuvinotto e nce caduta

Faceva ’a cuntignosa ’a sostenuta,

Ma pò nun s’è pututo cchiù tené!

Ma tutt’ ’o vonno

’O ninno bellino

’O sposo carillo

Ognuno ’vò...

Chi dice no

Fa apposta ma po’

S’ ’o piglia mò mò

’cchiù priesto ’o vò.

II.

Sapite di chi parlo amice mieje,

Sapite mò chi è sta piccerella?

E ‘a figlia ’o sè Biase, è Rusinella

Ca pe cient’anne pozza mbrufecà!

Pozza fà ’a vita de na principessa,

Pozza aunnare comme aonna ’o mare,

Cu chillo ninno affianco addà campare

Contenta e semp’allere pozzo stà!

Ma tutt’ ’o vonno

’O ninno bellillo

’O sposo carillo

Ognuno ’o vò...

Chi dice no

Fa apposto ma po’

S’ ’o piglia mò mò

cchiù priesto ’o vò.

(Cala la tela.)

FINE DELL’ATTO PRIMO