SCENA SECONDA

Felice e detta.

TERESINA (vedendo sotto l’uscio della porta in fondo Felice pallido): Uh! Zitto, lo vì lloco! (Si mette a stirare.) Voi state qua?

FELICE: (Che faccia de cuorno! Che spudoratezza! Io mò teneva na gran simpatia pe chesta, e mò invece m’è antipatica, nun la pozzo vedé, e se capisce, pecché io credeva c’avesse tenuto nu poco cchiù de contegno, che nun se fosse abbuccata accussì ambressa).

TERESINA: (Stà pensanno a li schiaffe c’ha avuto).

FELICE: (Chello che stò facenno, però, è indegno d’un galantuomo, non si fa. Muglierema ha lassato la casa, e m’hanno ditto che turnava ccà a fà n’ata vota la stiratrice. E io posso permettere ciò? Oh, mai! Povera figliola, l’aggio trattata malamente assai. Alla fine chella che male ha fatto? Lo male lo facett’io, che capitai dinto a lo balcone sujo. Assolutamente c’aggia parlà, e l’aggia fà turnà a casa. Che figura facimmo dinto a lo paese, e po’, io aggio tuorto, aggio tuorto assai. Stanotte, per esempio, vaco a trasì detto a la cammera de chesta, senz’avé ritengo che de rimpetto nce steva la cammera de muglierema. Cheste so’ cose de pazzo. Già, io steva mbriaco, chello vino m’aveva dato ncapo... si nun steva mbriaco nun lo faceva... Chesta però nun ha da dicere niente a Rusina, e si no, stateve bene, chi la capace cchiù). Teresì?

TERESINA: Che vulite? (Si guardano poi abbassano gli occhi.)

FELICE: Cride c’avimmo fatta na bella cosa? Nun te può credere quanto so’ pentito. E tu?

TERESINA: Oh, io io io nun so’ pentita affatto.

FELICE: E io sì, io sì. Te raccumanno però de nun dì niente a Rusina, me faciarisse nu male.

TERESINA: Ma niente, de che? Ah, aggio capito, lo fatto de li schiaffe?

FELICE: Lo fatte de li schiaffe? Quale schiaffe?

TERESINA: Chille che v’aggio date appena aggio apierto lo balcone. Si ne vulite n’ati 2 so’ pronte?

FELICE: (Questo poi è il colmo della faccia tosta!). Teresì, ricordete buono, tu schiaffe nun me n’haje dato.

TERESINA: Comme? Nun v’aggio dato duje schiaffe appena site trasuto?

FELICE: No, tutto lo cuntrario, chesto me credeva che facive, ma nun l’hai fatto. Tu m’haje fatto truvà pure a cammera a lo scuro, tanto che so’ ntuppato nfaccia a lo tavulino, e l’aggio fatto j nterra. Ricordate buono, Teresì.

TERESINA: (Aggio capito, Rusina nun tenette lo curaggio de lo piglià a pacchere... basta, è stato meglio accussì). Vedite... me pare che vuje, quanno trasisteve... trasenne, trasenne...

FELICE: Trasenne, trasenne, trasette... Teresì, cierti cose nun se ponno negà, agge pacienzie... ma te raccumanno, silenzio cu Rusina.

TERESINA: Oh, ve pare. La vedite ccà, stà venenno. (Vedite la cumbinazione! E che le dice mò?)