SCENA TERZA

Rosina e detti.

RUSINELLA (da lavandaia): Teresì, nce stanno cchiù panne da lavà?

TERESINA: Sta mappata che stà lloco nterra.

RUSINELLA: Va bene. (Prende la mappata.)

FELICE: (Quanto è simpatica vestuta accussì, me metto paura de nce parlà).

RUSINELLA: Ah, vuje state ccà? Scusate, nun v’aveva visto.

FELICE: Oh, e che fà, nun fà niente. Sò arrivato poco primma, pecché siccomme m’avevene ditto... (Sarria buono si chesta se ne jesse.) Io so’ venuto, pecché...

RUSINELLA: Aggio capito, pecché ve servene li cammise, so’ pronte, a n’atu ppoco l’avite fino a casa. Oh, nun nce pensate, la princepala mia è puntuale, le piace l’esattezza e la precisione. Na puteca de stiratrice comme a chesta, nun se trova manco a Napole. Avite fatto buono de mannà la biancheria vosta ccà, pecché ccà se lava buono, e se stira meglio. E panne nun se lavano co la putassa, hanna ascì bianche tutto a forze de vraccio. Vedite comme stò rossa, de la fatica che nce fa fà accussì. (Teresina batte forte il ferro da stiro sulla tavola. Felice fà un salto.)

FELICE: Me piace che state allegra, che vulite pazzià, ma fino ad un certo punto però. Rusinè, finnimola. Io aggio tuorto, so’ pentito de chello c’aggio fatto, jammuncenne a casa.

RUSINELLA: A casa? Quà casa? La casa mia sta abbascio a li putechelle, de rimpetto a la parrocchia, e vuje lo sapite. (Marcato:) Tengo na cammarella appriesso a papà, cu nu bello balcone, c’affaccia mmiezo a la piazza, e chillo balcone, vuje pure lo sapite. (Marcato:) Dinta a chella cammarella so’ nata, là dormo, e là voglio murì. Quanno me vulite truvà de juorne, me truvate dint’a sta puteca, addò vengo a li 7 de la matina, e me ne vaco a li 10 de la sera. Quanno nun lavo, stiro, e quanno nun stiro, lavo. Chesta è la vita che faceva, e chesta è la vita che voglio fà. (Altra botta di ferro.)

FELICE: Io te so’ marito, e chesto nun lo pozzo permettere.

RUSINELLA: Ma qua’ marito, qua’ marito! Jatevenne, sentite a me. Lassateme stà. Nuje avimmo pigliato nu sbaglio tutte e duje. Vuje siteve buono, teniveve na casa e na massaria de proprietà vosta, ireve nu galantuomo, e nun ve putiveve spusà a me, ch’era na miseria stiratrice, senza dote, senza niente, e io nun aveva fà stu matrimmonio, pecché aveva capì che vuje nun faciveve pe me... pe me nce vuleva nu giovene de strata, nu faticatore, uno ca m’avesse aiutato a lavà ed appiccià lo fuoco pe nfucà li fierre. Chillo, sì, chillo m’avarria fatto felice, e mò starrieme tranquille, qujete, e nce vularrieme bene! (Altra botta di ferro.)

FELICE: Dalle, dà! Voglio vedé si la fenisce!... Embè, Rusì, io da oggi in poi chesto voglio fà. Te voglio appiccià lo fuoco, te voglio abbagnà li panne, quanno tu nun te fide de levà, me metto io vicino a lo cufenaturo. (Teresina ride.) Nun ridere tu (amica traditora, amica falsa!). Voglio fà qualunque cosa, insomma te voglio aiutà, nun me voglio movere cchiù da vicino a te. Jammo c’aggia stirà, c’aggia lavà?

RUSINELLA: Allora parlate cu Teresina, è essa che ne ncarica de spartere la fatica.

FELICE: Teresì, c’aggia fà?

TERESINA: Che v’aggia dicere... pe mò nun nce stà da fà niente. Sciusciate nu poco sotto a stà fumacella.

FELICE: Eccome ccà. (Prende il ventaglio e si mette a soffiare al fornello.)

TERESINA: Bravo! Pe mò facite chesto, dimane po’ se vede addò ve putimmo mettere.

FELICE: Va bene.

TERESINA: Rusinè, viene, jamme a lavà st’ati panne, la princepale pe ogge vò luvà tutte cose da miezo.

RUSINELLA: E ghiammoncenne. (Comme me so’ purtata?)

TERESINA: (Bona, bona, assai!). Permettete?

FELICE: Fate. (Teresina via ridendo a sinistra Rusinella: la segue.) Have ragione, have ragione, io me mmereto peggio! Ma che figliola, che carattere, che sentimenti! Ma che saccio, vestuta da lavannara me pare cchiù chiatta, mi fà impressione.