SCENA PRIMA

Emilia e Luigi.

EMILIA (sta vicino al pianoforte leggendo una carta di musica. Luigi entra dalla destra): Guè Luì, e accussì che me dice?

LUIGI: E che t’aggia dicere Emilia mia, ogne ghiurnata, ogne sera che passa, cchiù perdo la speranza e cchiù me cunvingo c’aggia essere nfelice tutta a vita mia.

EMILIA: E comme se fa, come se fa?

LUIGI: D. Temistocle è partito stammatina pe Nocera cu lo primmo treno, e m’ha ditto: Stateve co lo penziero cujeto, pecché aggio fatto na penzata, tengo nu mezzo pe fà scumbinà tutte cose.

EMILIA: E che mezzo?

LUIGI: E che ne saccio, nun m’ha vuluto dicere niente. Me aveva prommiso che appena arrivava me faceva nu telegramma, ma intanto mò è tarde e nun se vede niente ancora.