IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
Temistocle, Nicolido, Carolina e Teresina.
NICOLINO: (con grosso bastone): Addò sta, addò sta, me lo voglio magnà vivo.
TERESINA: Voglio fà correre la guardia.
TEMISTOCLE: E ma io v’aggio pregato, si avite piacere de ncucciarle nun avita alluccà, pecché chille si ve sentene se ne scappene e stateve bene.
NICOLINO: Avite ragione ma che vulite da me, nun songh’io.
TERESINA: È lo sango che tenimmo dinto a li vvene.
NICOLINO: Piezzo de scellarato, se mette a prumettere, se mette a ghiurà e pò se ne scappa.
TERESINA: E chello che m’hanno fatto a me? Si io aggio dinto e mane a chillu scorfano de D. Saverio l’aggia fà la capa doje parte. Intanto si nun era pe vuje che nce veniveve a piglià io nun avarria saputo maje niente.
NICOLINO: Basta dicitece c’avimma fà?
TEMISTOCLE: Una cosa semplicissima. Qua adesso, c’è la prova dell’opera che si deve fare Domenica sera, io mò vaco da D. Gennaro, il padrone di casa e le dico che voi siete tre coristi. Vi mettete in quella stanza. (Indica seconda a destra.) Quando sentirete che io dico: Avanti, fuori, coristi, voi uscite e vi mettete a passeggiare, perché si finge che siete venditori, popolane. Appena vedrete a D. Felice, D. Saverio e Peppeniello, afferrateli e non li fate più muovere.
NICOLINO: Ma comme, aggia tené tutta sta pacienza?
TEMISTOCLE: E allora, alluccate, strillate, facite chello che vulite vuje ca io me n’esco da miezo.
CAROLINA: Va buono Teresì, facimmo comme dice lo maestro.
NICOLINO: E va bene, facimmo comme dicite vuje.
TEMISTOCLE: Ecco qua D. Gennaro. Silenzio.