SCENA PRIMA

Giacomo, Totonno e Biase.

All’alzarsi della tela di dentro a destra si sente suonare dall’orchestra un valzer.

GIACOMO (terminata la musica, alla porta prima quinta a destra): Ma cheste so’ cose de pazze, sapite. Stamme ccà da n’ora e no quarto, e non s’è visto ancora nisciuno invitato. Sule li musicante so’ venuto mez’ora fa, e stanno sunanno pe cunto loro, nce stanno spassanno a nuje.

TOTONNO: È capace che non vene nisciuno?

GIACOMO: Tu sì pazzo, non po’ essere; chella la Marchesa ha fatto tanti inviti, io stesso n’aggio portato na quantità stammatina, e po’ sarria n’offesa che le faciarria tutta la nobiltà, ched’è, sposa lo figlio, so’ invitate, e non nce venene?

BIASE: Manco lo Notaro è venuto ancora.

GIACOMO: Va trova che sarrà succieso. (Di dentro a sinistra una forte scampanellata elettrica.) La Marchesa nce chiamme, jammo a vedé che bò. (Via a sinistra.)

TOTONNO: Chella sà comme sta arraggiata. (Via, Biase lo segue a sinistra.)