IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
ATTO PRIMO
SCENA UNDICESIMA Felice, Peppino e Vincenzo poi Carmela e Bettina indi Ciccio.
I link alle concordanze si evidenziano comunque al passaggio
Felice, Peppino e Vincenzo poi Carmela e Bettina indi Ciccio.
VINCENZO: Dunque rimannimmo accussì, io mabbio co la carruzzella a la Torretta e v’aspetto llà.
VINCENZO: Facite ambressa, si no parte lo tram.
FELICE: Nun nce pensate, nuje mò venimmo.
VINCENZO: Ve raccomanno. (Via pel fondo a dest.)
PEPPINO: D. Felì, mme volite dicere quà è sta pensata che avite fatto pe nce ne j senza fa sapé a loro addò jammo?
FELICE: Ecco ccà... Nuje mmò li chiammammo. Io trovo la scusa che ha fatto male a vennere chilli vestite, essa è capace che me risponne, io la piglie a mazzate e nce ne jammo.
PEPPINO: Benissimo. Io po’ cu mugliererna nun trovo nisciuna scusa, appena esce la vatto.
FELICE: No, questo no, mettiamoci dalla parte della ragione. Primme hanna da venì e cchiacchiere, po’ l’appicceco, e po’ le mazzate.
FELICE: La cosa ha da essere naturale, si no chelle capiscene che sta mbruoglio sotto.
FELICE: Zitto eccoli ccà. Ricordete, primme li chiacchiere, po’ l’appicceco e po’li mazzate. (Escono Carm. e Bettina pausa, come un concerto.) Aggio saputo tutto, senza che me tiene mente.
CARMELA: Ch’hai saputo, ch’hai saputo?
FELICE: T’avisse vennuto tutto ma no chilli vestite.
BETTINA: E buje l’avisseve dato a mangià.
PEPPINO: Questi sono affari che a te non ti riguardano.
BETTINA: Ma gli affari miei mi riguardano però, grandissimo disperatone!
PEPPINO: A me disperatone! (D. Felì, la pozzo vattere?).
FELICE: (No ancora).
CARMELA: Belli vestite, miettatenne scuorno pure de li nnommenà, se l’hanno accattate pe doje lire e mmeze!
FELICE: Io si sapeva che te servevene doje lire e mmeze, te l’avarria menate nfaccia.
CARMELA: Vattenne, sbruffò... tu l’autriere te mpignaste na mappata de biancaria per 3 lire.
FELICE: Bell’onore! Bella figura mme faje fà cu n’amico che se trova presente.
BETTINA: Caspita! Se trova presente nu bello muorto de famma!
PEPPINO: A me muorto de famma! (D. Felì, la pozzo vattere?).
FELICE: (Mò, nce avimma da nfucà n’atu poco).
PEPPINO: Allora, na vota che sò muorto de famma, lassammece e felicenotte.
BETTINA: E lo ddicive pure, io chesto vaco truvanno.
CARMELA: E se sape, nce ne jammo, nce ne jammo!
FELICE: E n’ata vota cu stu nce ne jammo, ma io vurria sapé tu addò vaje?
CARMELA: Addò mme dice la capa, nun aggia dà cunto a te, tengo sempe frateme a Caserta.
BETTINA: E io tengo ziemo a Soriento.
CARMELA: E mò proprio me ne vaco!
FELICE: Embè, pe te fà vedé, mme ne vaco primm’io.
CARMELA: Nun mme ne mporta niente!
BETTINA: Nun mme passa manco pe la capa!
CARMELA: Bettì, jammece a mettere li cappielle.
CARMELA: Volimmo magnà e volimmo vevere a la faccia vosta!
FELICE: A la faccia de mammeta!
PEPPINO: Ricordate che m’hai chiamato disperatone e mmuorto de famma!
BETTINA: Sì, e te lo ttorno a dicere ciente vote!
PEPPINO: Nun te n’incarricà, t’aggia tirà tutte li capille!
BETTINA: A chi! A chi! (Carm. la trattiene. Esce Cicc. e trattiene Fel.)
FELICE: Tutto pe tte, lazzara, funnachera!
CARMELA: A me lazzara, funnachera!
FELICE: Sì, a te, a te! (Gridando.)
CARMELA: Statte zitto! (L’afferra.)
FELICE: Lasse, sangue de Bacco!
BETTINA (gridando): Fermateve!
CICCIO: Stateve sode! (Carm. bastona ben bene Fel., gli altri gridano cercando di dividerli.)
CARMELA: Ah! non ne poteva cchiù! (Via a sin con Bett. e Cicc.)
FELICE: Embè che? Io che t’aggio ditto: primma li chiacchiere, po’ l’appicceco e po’ le mazzate. Jammoncenne! (Viano.)