SCENA PRIMA

Vincenzo, e poi Totonno.

VINCENZO (dalla comune in fondo): Chillo cancaro de Totonno lo segretario dice che poco primma è arrivato da Napole cu doje belle figliole e che l’ha scritturate per ordine de lo signore. Vì che piezze d’assassino, vi si m’ha fatto sapé niente. (Guardando nella prima porta a dest.) Ah! Ah! La vecchia sta in calorosa conversazione cu D. Felice e chill’ato giovene, appena l’aggio portate l’ha voluto a tutte e duje dinta a la cammera soja, po’ m’ha chiammato da parte e m’ha ditto! Tiene, Viciè, cheste sò 50 lire pe quacche spesa ch’hai fatto; grazie, eccellenza. Io in tutto aggio spiso tre lire. (Ride:) Ah! Ah! Ah!

TOTONNO (dalla seconda porta a sin.): Va bene, va bene, mando a prendere subito ciè che avete detto. (Siede al tavolino e scrive.)

VINCENZO: Eh! Eh! Mò state ammuinato, Signor Segretario, mò sta chiuvenne dinto a la massaria vosta.

TOTONNO: Viciè, io t’aggio ditto tanta vote ntrichete de li fatte tuoje, tu sì cammariere? E fà lo cammariere, io sò segretario e faccio il mio dovere da segretario.

VINCENZO: Ah, sicuro! E tu lo segretario lo sai fa buono, specialmente quanno se tratta de scritturà piccerelle aggraziate.

TOTONNO: Io si scritturo piccerelle aggraziate, le scritturo pecché hanna da cantà dinto a lo cafè. Ma tu, Viciè, tu se sape che mestiere faje dinto a sta casa.

VINCENZO: Pecché che mestiere faccio io? Mò te tozzo co la capo ncoppa a lo tavolino.

TOTONNO: A chi tuzze co la capo ncoppa a Io tavolino, mò overo te chiavo lo calamaro nfronte!

VINCENZO: Tu mme chiave lo calamaro nfronte a me?

TOTONNO: Io, sì!