SCENA SESTA

A spremo e detto.

ASPREMO: È permesso?

TOTONNO: Chi è? Avanti.

ASPREMO: Il signor D. Carlo Pacchione è in casa?

TOTONNO: Sissignore, ma mò non credo che po’ dà retta a nisciuno, perché stà molto occupato. Voi chi siete?

ASPREMO: Io sono una persona che debbo parlargli di un affare importantissimo. Fatemi il piacere di dirgli se può dirmi 10 minuti di udienza.

TOTONNO: Va bene, accomodatevi; mò vado a vedé.

ASPREMO: Scusate.

TOTONNO: Niente. (Via pel fondo a sinistra.)

ASPREMO: Sangue de Bacco, m’hanno fatto lo servizio! Mme sò ghiuto a piglià Luisella ncoppa da D. Felice e là nun nce steva nisciuno, pe mezzo de lo guardaporta po’ aggio saputo che essa se n’è scesa, s’è aunita cu nu giovinotto che l’aspettava a lo pentone, e se sò mise dinta a na carrozzella; allora sò curruto adde lo patre de chillo stenteniello che lle và appriesso, e l’aggio ditto: guè, vide che chillo assassino de figlieto n’ha fatto fuì Luisella cu isso, dimme addò sta, pecché si no a te t’arapo la capa, e a isso lle faccio na querela e lo manno ngalera, sà! Nonsignore, pe carità, nun lle facite nu male, chillo è ghiuto scritturato a Pezzulo a lo cafè Chantà che s’arape stasera, forse s’ha portato pure a essa. Ah! S’ha portato pure a essa? Va bene, lo voglio conzolà comme dico io. Mme sò miso dinto a lo tram e sò venuto a Pezzulo, sò ghiuto a lo cafè, ma là nisciuno m’ha saputo a dicere niente: dice che nun lo sanno stu Giacomino. Nce sta na coppia che canta stasera, ma se chiamma coppia Berot, chiste hanna da essere lloro che s’hanno cambiato lo nomine. Lle voglio rompere li ggamme a tutte e dduje. Mò parlo co lo proprietario e m’ha da dì quacche cosa. E si lo proprietario nun mme dice niente pe nun perdere la coppia, io comme faccio? Chella la pensata sarría de pigliarle a cauce pe tramente cantano stasera... mm’avarria mettere dinto a lo cafè... eh, no, e po’ comme saglio ncoppa a lo palcoscenico? Avarria fa vedé che sò artista pur’io... perfettamente, chesta è na bona idea. Si nun mme vò ricevere, lle manno stu biglietto dinto. (Siede al tavolino per scrivere.) Nce volarria nu foglietto... (Prende la lettera che ha lasciato Carlo alla prima scena.) Che d’è, chesta? (Legge piano poi:) Sangue de Bacco! Che bello pensiero che mme vene, mò dico che songh’io lo fachiro, che mme sò ntiso meglio e sò venuto. Benissimo. Solamente accussì stasera li ppozzo ncuccià e li pozzo sciaccà. Sento rurnmore... Coraggio.