SCENA ULTIMA

Luisella, Aspremo, Giacomino poi Vincenzo e detti.

LUISELLA (gridando): Ajuto! Aiuto!

CARLO: Che ato è succieso?

ASPREMO: Te voglio strafocà, voglio passà nu guajo!

GIACOMINO: Lassateme!

CARLO: Signor fachiro...

ASPREMO: Che fachiro e fachiro, io songo lo patre de chella lazzarella che se n’è fujuta cu stu palicco, e tanto aggio fatto che l’aggio ncucciato!

CARLO: Comme! Voi non siete il fachiro Napoletano?

ASPREMO: Nonsignore, mme sò finto tale pe li ppiglià a cauce stasera ncoppa a lo palcoscenico.

CARLO: E mme faciveve stu bello piacere. Intanto mme site venuta a cuffià a me, ve faccio rinettere che io nun songo nu guaglione.

ASPREMO: Scusate, signore, dovete compatire un povero padre. (Luis.) Cammina a casa tu.

LUISELLA: No, voglio stà vicino a Giacomino.

ASPREMO: Sentite... sentite.

CARLO: Ma scusate, vuje mò a casa che ve la portate a fà? Facitele spusà e felicenotte.

ASPREMO: E se capisce... mo che pozzo fà. Avite ragione. (A Giacom..) Tu però te l’hai da spusà subeto.

GIACOMINO: Sissignore, non dubitate.

ASPREMO: Va bene.

LUISELLA: Oh, che piacere.

VINCENZO (uscendo): Eccellenza, aggio fatto tutte cose, li cartielle sò state mise, lo Sinneco ha mannato n’ati diece guardie vicino a lo cafè, riguardo a la palla, ve manna a dicere che sì l’accettate,.. isso ve manna la soja, chella che sta mmiezo a la sala de lo consiglio.

CARLO: Va bene.

VINCENZO: Ma scusate, mò è tarde, gli artisti quanno si vanno a vestì, là s’ha d’arapì lo cafè si no la folla lo scassa!

CARLO: E ghiammo, jammo, nun perdimmo tiempo. Signori miei, vi raccomando di divertire bene il pubblico.

FELICE: Non dubitate per questo... va bene che non è genere nostro, ma mò simme là, per divertire il pubblico faremo qualunque cosa!

(Cala la tela.)

Fine dell’atto secondo

Il terzo atto a piacere