SCENA TERZA

Pasquale e dette.

PASQUALE (in veste da camera e berretto): Sà, te dico na cosa, nun me parlà de Cuncettella, de la fà rimmanè, de la perdunà, pecché me faje fà cose de pazzi! Io non intendo che stia più in questa casa, è scostumata, è na lazzarona! Nun la voglio tené cchiù, è inutile che mi pregate, basta!

TERESA: Ccà nisciuno te sta preganno! Haje ditto ca se n’adda j, e se ne va, a n’ato ppoco vene pure la cammarera nova.

PASQUALE: Bravo! S’era arrivato a nu punto ca nun se puteva j cchiù nnanze! Primmo de tutto s’è miso a fà ammore nientemeno cu nu sguattero de cucina, il quale continuamente l’aspetta mmiezo li grade, e llà se metteno a chiacchierià, e chi passa adda tenere la cannela a loro!

ADELINA: Chesto non è overo!

PASQUALE: Silenzio voi... con voi poi faremo i conti! E chesto sarrìa stato niente, fino a che faceva ammore mmieze li grade comme le gatte nun me mpurtava, ma mò aveva accuminciato a purtà lettere amorose... e di chi poi?... De nu disperato!...

ADELINA: Ma vui ve ngannate zi zi, Alberto nun sta disperato. Informatevi meglio.

PASQUALE: Me so’ informato, me so’ informato... bella cosa nu guantaro, attaccare parentela cu nu guantaro, e chesto nce mancarrìa! Tu lo capisce ca io so’ nu signore, che mio padre è stato assessore Municipale, oggi o domani mi faranno consigliere e poi assessore e... e co lo tiempo pozzo addeventà pure sinneco... chi lo ssape!

ADELINA: E Alberto a maggio ha ditto che mette la puteca a Tuledo... ve pare niente?

PASQUALE: Me fa tanto piacere; quanno aggio bisogno de guante vaco addo isso, ma che sposa a te, chesto se l’adda luvà da la capa! Tu dipendi da me, sono tuo zio e tutore. (A Teresa.) Tu nun rispunne?

TERESA: Ch’aggia risponnere! Nce l’aggio ditto che a te stu matrimmonio non te fa piacere... (Fa segno di tacere ad Adelina.) Pe mò... appriesso pò se vede.

PASQUALE: Che appriesso e appriesso, nun me farrà piacere mai. Sicuro, mò facimmo lo fatto de chell’ata capricciosa de sorete che pe se mmaretà s’ha pigliato a nu cappellaro... Bell’onore... non ce pozzo penzà, tenè nu nepote cappellaro

ADELINA: Chesto nun vò dicere niente, basta ch’è nu giovane onesto, la vò bene, e l’ha fatto felice.

PASQUALE: E io nun la pozzo cchiù trattà pecché nun sta a livello mio... e basta sa... nun voglio parlà cchiù cu te. (A Teresina.) Te prego nun la fà parlà!

TERESA: E già, mò l’appile la vocca... Statte zitto, ah... famme stu piacere...

PASQUALE: Ajere ssera me pigliaje chello poco de collera, neh pe chi? Pe na femmena de servizio. M’aggio fatto nu suonno stanotte ca nun saccio comme nun sò muorto! Neh! Che me vaco a sunnà? Che nientemeno Cuncetta me pesave dinto a nu murtale! M’aveva fatto addeventà na papocchia! Io diceva: Va buono mò; fenimmole, statte cujete, e essa niente, co lo pesature mmane scamazzave, ntrunchete, ntranchete. senza pietà! Pò ha fatto nu purpettone e me steva menanno dinto a lo fumo. Appena aggio visto le fiamme è stata tale la paura che me so’ scetato. Figurateve si la pozzo tené cchiù dinta a la casa mia. Chella è stata na visione. Si la faceva stà n’ato ppoco chi sa che guajo avarrìa passato!

TERESA: Va buono. Cheste so’ le solete esagerazione toje!

PASQUALE: Sarrà. Mò che vene la cammarera nova falle tutta la scola, nun la dà chiacchiarià, nun adda fà ammore, nun adda purtà lettere amorose a nepoteme, si no l’accumpagno a cauce abbascio a lo palazzo!

TERESA: E se capisce! Intanto io mò sto penzanno, nuje jammo a Puortice adda cummara. Tu ajeressera diciste ca jve a Caserta a vedé la massaria che se venne. Chi rimane pò ccà?

PASQUALE: Comme chi rimane? ’A cammarera nova!

TERESA: E nun me pare na cosa regolare, nun sapimmo ancora chesta chi è, la rummanimmo dinta a la casa.

PASQUALE: Embè, comme vuò fà?

TERESA: Si nun te dispiace, aggio ditto a Cuncettella che rimanesse fino a dimane a ssera, nce fa vedé l’uso de la casa. Si pò te dispiace nun ne parlammo cchiù!

PASQUALE: Va bene, trattandosi fino a domani, però nun la voglio vedé.

TERESA: Nonsignore, nun te la faccio vedé; l’haje da fà sulamente lo certificato de ben servito.

PASQUALE: Sicuro, lo certificato nce lo faccio! (Nce lo voglio fà comme dich’io!).

TERESA: Jammo Adelì, jammece a priparà.

ADELINA: Eccome ccà. Zi zi vi bacio la mano.

PASQUALE: Grazie, nun fa niente, andate!

ADELINA: Abbasta ca non ve pigliate collera, io faccio tutto chello che vulite vuje!

PASQUALE: Va bene, andate! (Le due donne viano a sinistra.) Povera figliola da na parte me fa pena, ma io non posso mai permettere ca se sposa a nu guantaro!