IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
LUISELLA: Signò, ha ditto la padrona che ghiate dinto pecché vò sapé pure lo gusto vuosto.
FELICE: E te pare... Putevo sta nu poco cujeto? Eccomi qua! A proposito, Luisè, tu stasera accumpagne nu mumento a D. Celestino a lo cullegio.
LUISELLA: A D. Celestino? Sissignore.
MICHELE: Agge pacienza, Luisè... nun tengo a nisciuno.
MICHELE: Jammo a vedé se mia moglie sta comoda de trasì dinto. Ma è modo chisto de fà la mugliera?... (Avviandosi.)
FELICE (seguendolo): Michè nun te lagnà... È sempe na bella guagliona... Io tengo chillu museo ambulante vicino... (Escono.)
LUISELLA (guarda Celestino): (Lo vi ccà, lo j... E tutte manera è simpatico: de profilo, de prospetto, de spalle...). Don Celestì... buongiorno.
LUISELLA: Dunque stasera v’accompagno io lo cullegio... A che ora avimma j?
CELESTINO: Alle nove.
LUISELLA: Ma comme, accussì priesto ve ne jate? Nun site stato manco otto juorne...
CELESTINO: Eh, cara mia... non c’è che fà! Bisogna studiare! Lo studio è il primo dovere dell’uomo. L’uomo nasce per la scienza!
LUISELLA: Va bene, ma nun v’avita fissà troppo a studià, pecché ve pò fà male... Quacche vota penzate pure a ve spassà nu poco!
CELESTINO: Ma nuje a lo cullegio ce spassamme! Ogni giorno abbiamo un’ora di ricreazione!
LUISELLA: Uh, signurì... e ched’è la ricreazione?
CELESTINO: Comme che d’è? Stammo in riposo, non si studia, nun se fa niente e pazziammo tutti li cumpagne. Pigliammo la carta e facimmo palluncine, cavallucce, pupazzielle, areoplane cu li mmosche...
LUISELLA: Uh, mamma mia... e che spasso è chisto? Jatevenne, signurì, vuje mò site gruosso, site nu bellu giuvinotto e facite ancora pupazzielle de carta?
CELESTINO: Embè ch’aggia fà?... Io me vularria spassà de n’ata manera, vularria stà ccà n’ata quinnicina de juorne... ma non posso... m’aggia retirà...
LUISELLA: Che peccato! La sera facevemo sempe nu poco de conversazione... nce facevemo quatte rise... Ve ricordate?
CELESTINO: A me, vedete, me dispiace pe na cosa sola che me n’aggia j...
LUISELLA: Che cosa?
CELESTINO (con comica vergogna): Nun lo vvoglio dì...
CELESTINO: E voltatevi da llà se no non lo dico...
LUISELLA (voltandogli le spalle): Dunque...
CELESTINO: Me dispiace de me ne j... pecché nun veco cchiù a vvuje.
LUISELLA (girandosi verso di lui): Veramente?
CELESTINO: Veramente!... Che ssaccio... m’ero abituato a parlà cu vuje... accussì... senza suggezione... a pazzià nu poco...
LUISELLA: E io pure... io pure...
CELESTINO: D.ª Luisè... io, a verità... me so’ miso sempe scuorno de ve dicere na cosa... (Reticente.)
LUISELLA: E che cosa, che cosa?...
CELESTINO (ritroso): Volevo sapé... si vuje aviveve piacere... de ve mettere a ffa ammore cu mme!...
LUISELLA: Io?!... Uh, signurì, stateve zitto, pe carità! Nun voglia mai lo cielo ve sente lo zio vuosto!...
CELESTINO: E ca chesta è la paura mia! Ma ch’aggia fà, io quanno stongo vicino a vuje... me sento fà li ccarne pecune pecune... me sento na cosa curiosa... nun saccio ched’è! Quanno te tocco sta mano, io tremmo tutto quanto, sudo... e me faccio friddo manco la neve... (Si sente abbaiare il cane internamente.) Lo vì lloco lo cano, oj. (Fugge impaurito sotto la porta.)
LUISELLA: Nun ve mettite paura! (Verso il finestrino.) Passa llà... passa llà... puozze passà nu guajo! Mò vedimmo si nun te faccio murì!...
CELESTINO: Chillo si se mena da llà ncoppa ce piglia a mmorze!...
LUISELLA: No, no... pe se menà, nun se mena... Dunque, stiveve dicenno?
CELESTINO: Stevo dicenno ca ve voglio bene assaje assaje, simpaticona mia!... (Voci interne di Concetta, Michele, Felice e Rosa.)
LUISELLA: Zitto, zitto... Esceno ccà ffora! (Scappa per la destra. Celestino riprende il libro e siede fingendo di studiare.)