SCENA QUINTA

Bettina e detti.

BETTINA (con caffè): Signurì, lo cafè.

FELICE: Miettele ncoppa a lo tavolino, dinto a lo salotto, mò me lo vaco a piglià.

BETTINA: Sissignore. (Via a destra, poi torna.)

FELICE (ridendo) D. Rafele s’è miso co n’auta femmena. So’ cose de pazze, uno ha da ridere afforza! (Via a destra.)

NINETTA: Povera mammà, povera vecchia, all’età soja avé chisto dolore! Ma stongo io ccà però, chiunque è sta femmena l’ha da fà co mmico! (A Bettina che ritorna dalla destra.) Bettì, viene ccà, dimme na cosa.

BETTINA: Comandate, signorì...

NINETTA: Mammà co chi pratica, chi songo li femmene che la venene a trovà?...

BETTINA: Li femmene che la venene a trovà?... Una sola, vene a fà lo scopone la sera.

NINETTA: Ah, vene a fà lo scopone ha sera? E chi è, comme se chiamma?

BETTINA: E na certa D.^a Lauretta, che io non la pozzo vedé pe la superbia che tene. Quanno vò quacche cosa comanna comme fosse la patrona de la casa, ajessera me facette avé na cancariata da lo pate vuosto pe causa soja, dice che io la tratto malamente. Essa dice ch’è na signora, vedova de no gran negoziante genovese, ma io, a la verità, non nce credo

NINETTA: E comm’è, è na bella figliola?

BETTINA: Eh, accussi, non nc’è male.

NINETTA: E addò sta de casa?

BETTINA: Ccà, dinto a lo stesso palazzo, a lo primmo piano.

NINETTA: Ah, è inquilina de papà?

BETTINA: Sissignore, tene chillo quartino a sinistra co lo ciardino.

NINETTA: Ah, bravo. Grazie tanto. (Bettina si mette a rassettare la stanza.) Chella è essa! E mammà riceve sta femmena dinto a la casa? E non tene lo coraggio de le dicere niente. Fortuna che so arrivata io. M’incarrico io de fà capì a sta signora che ccà non nce ha da venì cchiù! (Si avvia.)