SCENA OTTAVA

Ninetta e detta.

NINETTA (dal fondo a destra): Tutto è fatto.

ROSINA: Che cosa?

NINETTA: Vengo da essa, dalla Signora Lauretta.

ROSINA (ridendo): Ah, là dunche sì stata?

NINETTA: Sì.

ROSINA: Ma primme d’azzardà na cosa de chesta, me lo potive dicere a me.

NINETTA: E si ve lo dicevo, me faciveve j?

ROSINA: Ah, no certamente!

NINETTA: Dunche, aggio fatto buono a non ve dicere niente. Vuje site troppo debole, mammà. Co sti fatte s’ha da essere risoluta, s’ha da taglià subeto la cancrena; si no lo male cresce.

ROSINA: Ah, sì; haje ragione, ma insomma che l’haje ditto a chella figliola?

NINETTA: Pochissime parole e so’ bastate pe non la fà venì cchiù dinto a sta casa.

ROSINA: Possibile! Ma che l’hai ditto?

NINETTA: L’aggio ditto la buscia pe sapé la verità. Aggio fatto vedé che io sapevo tutto cose, cioè della relazione che tene co papà, allora essa s’è fatta una lampa de fuoco, ha calato l’uocchie nterra e po m’ha ditto: Che volite che ve risponno? Ve lo giuro, ncoppe non nce saglie cchiù, papà vuosto faccio comme non l’avesse mai conosciuto. Io allora sentenne chesto, che auto le potevo dicere? L’aggio lassata comme a na bestia fore a la sala e me ne so’ ghjuta.

ROSINA: Che sento? Ma allora è overo? Veramente s’è mise co chella? E io che non me ne songo mai accorta. Che ciuccia che so’ stata! Uh! Mamma mia e quanno s’appura sto fatto che figura facimmo, a chell’età! Birbante! Assassino!... Uh! Niné, aiutame, me sento venì na cosa... m’abbaglia la vista... M’avota la capa!... (Siede svenuta.)

NINETTA: Mammà, mammà, pe carità, non me facite mettere paura! Uh! Chella s’è fatta fredda fredda! (Gridando.) Neh, quaccheduno, corrite ccà!