IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
ATTO TERZO
SCENA NONA Raffaele, poi D. Peppino, Fifì, Felice e Luigino, indi Ninetta.
I link alle concordanze si evidenziano comunque al passaggio
Raffaele, poi D. Peppino, Fifì, Felice e Luigino, indi Ninetta.
RAFFAELE: Rosina? E comme? Piglie nu poco d’acite.
NINETTA: Aspettate, io tengo lo liquore Anudino. (Via a sinistra.)
RAFFAELE: Rosì, Rosì, mugliera mia, ch’è stato? Apre l’uocchie, Songh’io, so’ maritete, so’ Papele tujo!
ROSINA (aprendo gli occhi): Ah, sì tu? Nfame, birbante! (Gli dà un forte schiaffo, in questo momento dalla porta in fondo a sinistra comparisce D. Peppino, Fjfì, Felice e Luigino, i quali si fermano sotto la porta.)
RAFFAELE: All’arma soja! E pecché m’hai chiavato sto pacchero?
ROSINA: Pecché te lo mierete, viecchio viziuso!
RAFFAELE: Ah, sà, tu la finzione l’hai da fà co li parole, non già co li mmane, lo sai che m’hai fatto male?
ROSINA: E se capisce e che te vulevo fà bene? Galiota, assassino!...
ROSINA: Sì, veramente, veramente!
NINETTA (esce con bottiglina di odore): Mammà, non ve pigliate cchiù collera!
ROSINA: Me voglio spartere, non te voglio vedé cchiù! (Via a sinistra.)
NINETTA: Ma mammà, sentite. (Via appresso.)
RAFFAELE: Ma fa apposta o fa overo? Lo schiaffo è stato overo! Forse pecché D. Michele l’ha ditto ncasate la mano! Ah! Già. Tu sei na vecchia pazza! Hai capito? Na vecchia pazza! (Dice queste parole gridando e va appresso a Rosina e Ninetta.)
PEPPINO: D. Luigì, tenite auti pariente da nce fà conoscere? Chisto è lo convento? Chiste so’ l’angiole?
LUIGINO: E che ne saccio, quanno mai hanno fatto chesto! Io non capisco niente cchiù!
FIFÌ: Quanta strille, mamma mia!
PEPPINO (vedendo che Felice ride): E lo cognato vuosto che ride pure! Me pare che non sta a cuffià la gente de chesta manera! Serafì, jammoncenne, non è cosa!
FIFÌ: Pare comme lo facisseve apposta!
PEPPINO: Ma pe chi nce avite pigliato neh, D. Luigi, io sò no galantuomo, addimannate a Casoria io chi songo. Jammoncenne Serafì, non ne parlammo cchiù! Avite ditto che papà e mammà erano duje angele, chille sò duje diavole scatenate. Mamma mia, e chi nce vò avé che fa! Jammoncenne, jammoncenne! (Via pel fondo a sinistra. Fifì lo segue.)
LUIGINO: Ma pecché mammà ha chiavato chillo sorte de pacchero a papà?
FELICE: Non è overo, hanno fatto apposta.
FELICE: È na finzione che fanno pe fà cagnà lo carattere a soreta, pe le fà vedé quanto è brutto quanno s’appiccechene marito e mugliera. Me l’hanno ditto loro poco primma.
LUIGINO: Ah, perciò, io voleva dicere! E ghiusto mò l’avevano da fà, assammencelle j a dicere a D. Peppino... Vuje vedite la combinazione, se nc’è miso lo diavolo! (Andando via.) D. Peppì... D. Peppì...
FELICE: Io mò moro da la risa, non ne pozzo cchiù! Intanto, co tutta la pazzia D. Rafele ha avuto chillo papagno! (Ride.)