SCENA TREDICESIMA

Antonino seguito da Bettina e detti.

ANTONINO: Signori miei, vengo a darvi una bella notizia. D.^a Lauretta ha accettato la proposta de matrimonio che l’aggio fatto e lo mese che trase spusamme.

RAFFAELE: Bravissimo!

ROSINA: Veramente?

ANTONINO: Veramente.

RAFFAELE (a Rosina): (Va buono mò? Sì contenta?).

ROSINA: (Respiro!).

MICHELE: Dimme na cosa Antonì. Tu che volive da me stammatina che te serveve pe la causa de D.^a Amalia Fresella?

ANTONINO: La lettera che te dette a leggere sei mise fa, che essa trovai dinto a la sacca de lo marito.

MICHELE: E la copia la tiene?

ANTONINO: Sì, eccola ccà. (La caccia.)

MICHELE: E falla vedé a muglierema. L’originale la tene essa, l’ha trovato e se crede che appartiene a me.

ANTONINO: No, cara Signora, chella è de na cliente mia, e datemella pecché dimane l’aggio da presentà all’udienza. Tenite, liggite la copia. (La dà.)

CARMELA (legge la lettera piano, poi dice): Aggio tuorto. So’ na bestia. Pigliatavella.

ANTONINO: Grazie tanto.

CARMELA: Agge pacienza. Michè, aggio fatto chesto pecché te voglio troppo bene.

MICHELE: E io perciò te perdono.

RAFFAELE: Niné, fa pace cu maritete.

NINETTA: Oh, pe me nun nce pensate, a nuje è n’auta cosa.

RAFFAELE: Te lo comanda tuo padre!

NINETTA: È inutile. M’avarria dicere pecché ajere teneva chella puzza de muschio ncuollo, e siccomme non me lo pò dicere, non se pò discolpà, non potimmo fà pace.

RAFFAELE: Che dite voi? Vi potete discolpare?

FELICE (sardonico, caccia la lettera di Carluccio dalla tasca): Leggete questa lettera.

NINETTA: E ched’è sta lettera?

FELICE: Me l’ha mannata Carluccio lo servitore, l’aggio ricevuta poco primma. (A Bettina.) È vero?

BETTINA: Sissignore... signorì.

NINETTA (dopo letta la lettera): Possibile! E comme, Teresa se permette de fà sti pazzie co tico, nce ha da stà quacche cosa co Teresa.

FELICE (gridando): Eh! Mò Teresa mò? E feniscela, quanno jammo a Napole ne la cacciamme!...

RAFFAELE: Me pare che può essere contenta, abbracciateve, andiamo! (Felice e Ninetta si abbracciano.) E vuje pure! (A Michele.)

MICHELE: Ma se capisce!

CARMELA: Co tutto lo core! (Si abbracciano.)

ROSINA: E a me, ched’è, non m’abbracce?...

RAFFAELE: Se sape... e stretta stretta! (Abbraccia Rosina.)

ANTONINO: Che bella cosa! Che bello quadro!...