IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
I Facchino, comparsa, e detti.
I FACCHINO: Ecco ccà la ramma, nuje avimmo fenuto, avimmo da saglì sulo no stipo.
BETTINA: Sta ramma mìettela dinto a la cucina che mò la vaco appennere, e purtate pure sta canesta de butteglie.
I FACCHINO: Va bene. (Esegue. Entra seconda porta a sinistra, poi esce via a destra.)
BETTINA: Diciteme na cosa D. Carlù, dinto a sto palazzo abita no giovinotto, no certo D. Luigi, architetto?
CARLUCCIO: Bruno, co no mustacciello niro?
CARLUCCIO: Sissignore, se chiamma Luigi Belfiore, è amico de lo patrone mio, sta a lo terzo piano, tene doje cammere mobigliate, ma me pare che ogge se ne va pur’isso.
BETTINA: Sissignore, chesto lo saccio, va pe na ventina de juorne a Roma da no zio de lo sujo.
CARLUCCIO: Nce facite l’ammore, dicite la verità?
BETTINA: Nonsignore, fà l’ammore co la signorina mia, la quale nce va pazza, nce tene na passione che non ve potite credere, ha ditto che o se sposa a chillo o a nisciuno.
CARLUCCIO: E lu patre lo ssape?
BETTINA: No, non voglia maje lo Cielo, D. Ambrogio non ne sape niente, e sapite si mò nce sta ncoppa?
CARLUCCIO: Ve diciarria na buscia veramente, ma mò non è ora che nce po’ stà, l’aviveve da dicere quacche cosa?
BETTINA: No, l’aveva da fà na mmasciata, sperammo che cchiù tarde se fà vedé. Permetteteme, io vaco dinta a la cucina ad appennere chella ramma, pecché si no mò che vene lo patrone sapite che se fà afferrà...
CARLUCCIO: Me dispiace che non ve pozzo venì a da na mano, pecché aggio che fà.
BETTINA: Grazie tanto, nonsignore. Guardapò... comme te chiamme tu?
BETTINA: Rafè, damme sta chiave de la scala de servizio, chesta è meglio che la tengo io.
RAFFAELE: Favorite. (Le dà la chiave.) Mò che vene lo patrone po’ ve consegno tutte l’auti chiave.
BETTINA: Va bene. Permettete, D. Carlù.
RAFFAELE: Carluccio mò se ne fà n’auto surzo. (Bettina via a sinistra.)
CARLUCCIO: Vì che bella guagliona, mannaggia che tengo l’arte soggetta.
RAFFAELE: Carlù, io te ringrazio, m’haje fatto smucculià chisto cannelotto.
CARLUCCIO: Agge pacienzia Rafè, non nce aggio badato.