SCENA TREDICESIMA

Felice solo, poi Ambrogio.

FELICE (dal balcone viene in iscena inzuppato d’acqua.) Aggio pigliato chisto sorte de bagno! E comme se combina? Mamma mia e dimane na bronchita chi me la leva! Mannaggia la capa mia, mannaggia! Si non me fosse distratto, e non fosse trasuto ccà, credennome ancora la casa mia, tutto chesto non me succedeva. (Va alla porta.) Scuse! Ccà la chiave non nce sta cchiù! E comme faccio? Aggio passato lo guajo!... Voi vedete la combinazione... Dinto a lo salotto nce sta no cammino... stesse appicciato... m’asciuttarria no poco. Cielo mio, fammillo trovà appicciato! (Entra prima a sinistra.)

AMBROGIO (in maniche di camicia, ha fra le mani un involto di berretti di notte una grossa pistola): Credo che mò le sarrà passata la paura, mò me cocco io ccà, non fa niente che sta la porta de li grade vicino. Che sciocchezza! M’aggio portata la commarella però. (Mostra la pistola.) Eh, co chesta non se pazzea, chesta fa poche chiacchere, mettimmola sotto a lo cuscino. (Esegue.) A me uno cuscino m’abbasta, chist’auto me lo metto ncoppa a li piede. (Passa un cuscino ai piedi, poi siede su di una sedia, si leva i pantaloni, si mette un berretto e si corica covrendosi, mentre si spoglia dice:) Chella guagliona da che ghiette a la festa de ballo, non conchiude cchiù, l’hanno fatto perdere li cervella!... Chella po’ è piccirella, se capisce, che nce vò, a piglià na passione. Ma io dico a sto tale: tu pecché non te sì presentato a me?... È segno che i tuoi principii non sono retti, e allora pecché me viene a ncuietà la casa mia, va a n’auta parte... gué stasera fà no poco de frischetto. (Si è coricato.)