SCENA NONA

Felice, e detto, poi Agapito.

FELICE: Che volete, papà.

AMBROGIO: Pecché ve ne site juto, ho avuto una forte quistione co sta bestia affianco a me, dice che vuje avite fatto l’ammore co la figlia e po’ l’avite lassata, s’è miso ad alluccà da llà ncoppe: Luigi Belfiore è uno svergognato, è un imbecille!... e po’ v’ha dato pure no schiaffo.

FELICE: A me?

AMBROGIO: Già... cioè l’aggio avuto io, ma a vuje era diretto. Sta ngiuria non nce l’avimmo da tené, vaco a piglià doje pistole, e buje avite da fà l’ommo, capite, l’ommo! Non potimmo fà na cattiva figura con no turzo de carcioffola comme a chillo, io sarò il vostro testimone.

FELICE: Ma papà, sentite...

AMBROGIO: Ccà non nce sta da sentere, chillo ha insultato assai, che ve manca lo coraggio forse? Ve mettite paura?

FELICE: Io, paura io, io non saccio che significa la paura.

AMBROGIO: Benissimo! Vaco a piglià li pistole. (Via a sinistra.)

FELICE: Oh, chesta mò è bella mò... e comme faccio... aspetta, aggio fatta la pensata! (Via pel fondo.)

AGAPITO (lato dritto con due pistole): Cheste so’ doje pistole che non hanno mai fallito. Chillo se credeva che io me metteva paura de fà no duello, seh, e sta frisco! N’aggio fatte quinnece, e chisto so’ sidece. La razza Fresella è conosciuta da tutta Napoli, non s’hanno fatto passà mai la mosca pe lo naso.