IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
SCENA PRIMA
PEPPINO (seduto alla scrivania di destra): D. Gaità, lo Giudice Conciliatore è venuto?
GAETANO (seduto alla scrivania di sinistra): E vuje a chest’ora vuliveve lo Giudice Conciliatore, chillo si non è l’una non comparisce, tanto isso quanno lo Vice Sinneco hanno da j a fà primma marenna, po’ quacche affare de lo loro, po’ na cammenata e po’ venene.
PEPPINO: E bravo, vì che bella cosa, solamente nuje avimmo da venì impunto ll’otto, e si tricammo na mez’ora, succede lo trentuno. Stammatina pure tenite folla?
GAETANO: Se capisce, ccà ogne ghiuorno nce sta na battaglia, pecché ogge è l’epoca che li diebbete nisciuno li bò pagà.
PEPPINO: E co tutto chesto, l’uommene se nzorane a meglio a meglio, stammatina nce stanno duje matrimonie.
GAETANO: Lo Cielo li pozza benedicere. (Voci di dentro.) Vivene li spuse!
PEPPINO: Ecco ccà, nce simme. (Si alza.)
GAETANO: (Puzzate sculà!). (Si alza e via dal Conciliatore.)