IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
ATTO TERZO
SCENA QUARTA Bettina, poi Ambrogio, Carmela, Salvatore, Michele, e detto.
I link alle concordanze si evidenziano comunque al passaggio
Bettina, poi Ambrogio, Carmela, Salvatore, Michele, e detto.
BETTINA (dal fondo): Neh, D. Felì, vuje state ccà? Ah! Che puzzate sculà!...
BETTINA: Avite fatta fà la nottata chiara chiara a chella povera signorina mia!...
BETTINA: Comme pecché? Ma vuje che cancaro v’avite mise ncapo, chella a buje non ve vò, non ve vò...
FELICE: E che me ne preme a me, io voglio li denare mieje.
BETTINA: E pe salvà li denare, la signorina acconsentito fino a mò, ma mò comme se fa, comme se fa... chille stanne saglienno, mannaggia quanno maje nce capitasteve dinto a la casa nosta.
BETTINA: Chisto è stato n’inganno che nce avite fatto... vuje avite vista la guagliona, v’è piaciuta e ve la vulite piglià, ma chella ha ditto che se sta zitto fino a lo momento che addà firmà e ha da dì che si, primme de succedere chesto, ha ditto che fa cose de pazze!
FELICE: Ma nonsignore, dincello, che io appena aggio li denare, me ne fujo!
BETTINA: Zitto, zitto, li bì ccà.
AMBROGIO: Trase, figlia mia, trase, gue, Luì, tu staje ccà? Bravo! Che esattezza, accussì avarriene da essere tutte l’uommene! (A Salvatore e Michele.) Chisto ccà è lo sposo, che ve ne pare?
SALVATORE: Che nce adda parè, Princepà, ve pare, no giovene scegliuto da vuje pe la figlia vosta, adda essere pe forza rrobba bona, rrobba de primma qualità.
AMBROGIO: Luì, io te presento Salvatore Scorza, capo masto muratore.
SALVATORE: Stia comoto, preche...
AMBROGIO: È un uomo di grande abilità.
SALVATORE: Troppo buono, e bontà bosta, all’occasione facimmo tutte cose, fravecammo, ntunacammo, maniammo la cucchiara spaccammo le preta, nce mbrogliammo Co lo gesso pe quacche ntelatura, senza fà chiammà lo siciliano, si s’ha da fà quacche mesurella pure la sapimmo fà... nce accunciammo.
FELICE: Che persona rispettabile.
SALVATORE: Fatico co lo princepale ccà presento da 25 anne.
AMBROGIO: Sicuro, 25 anne, era piccerillo.
SALVATORE: Lo voglio bene comme fosse pateme, e forse cchiù de pateme, si quaccheduno le facesse na mal’azione, se potarrìa chiammà muorto, lo spaccarrìa comme a na preta!
FELICE: (E te può preparà che nce simmo!).
AMBROGIO: Michele Ceuza, peperniere...
FELICE (a Michele che sarà una comparsa): Sono veramente fortunato. (Gli stringe la mano.) (Papà, credo che mò me potite dà chilli denare?).
AMBROGIO: (Ma che paura hai, vorria sapé. Stanne ccà. (Caccia un portafoglio) a n’auto ppoco te li dongo...). Neh, ma movimmece, che nce facimmo ccà... Carmè, tu che hai... tiene la faccia de l’arraggia.. e statte allegra, figlia mia.
CARMELA: (Che saccio, papà, tengo no core scuro scuro, na voce me sta dicenno dinto a la recchia, non te lo piglià a chisto...).
AMBROGIO: (Oh, chesta sarria bella mò... Carmè, non fà pazzie, non me fà fa cattive figure, pecché si no so’ guaje sì, mò tutto nzieme te ne viene co la voce dinta a la recchia, tu haje da sentì la voce de pateto solamente, hai capito? Luì, addò avimmo da trasì?
FELICE: (Mò li faccio aspettà dinto a lo Giudice Conciliatore!). Da chesta parte, favorite, aspettammo lo Vice Sinneco che ancora addà veni. Trasite, trasite...
CARMELA (a Felice): (Li denare l’avite avute?).
FELICE: (Ha ditto che mò me li dà).
CARMELA: (Puzzate murì de subeto!).
FELICE: (Vuje e papà!). (Tutti entrano nella stanza della Conciliazione a sinistra.)