SCENA SETTIMA

D. Gaetano e detto poi Felice.

LUIGI (a Gaetano che esce): Neh, scusate, il Giudice Conciliatore ci sta?

GAETANO: Mò proprio è arrivato, ma stanno gente dinto, voi tenete qualche chiamata?

LUIGI: Sissignore, eccola qua. (Dà la carta.)

GAETANO (legge): Va bene! Accomodatevi, sarete chiamato. (Via portando con sé la carta.)

LUIGI: Grazie.

FELICE (uscendo): Sangue de Bacco, aggio fatto lo colpo, appena è trasuto lo Giudice Conciliatore, D. Ambrogio s’ha creduto ch’era lo Vice Sinneco, e tanto de lo piacere ha pigliate li denare e me l’ha date. Cielo mio te ringrazio.

LUIGI: Che beco! Felice!

FELICE: Luigi!... Ah, mannaggia chi t’allattato! Sì tornato da Roma?

LUIGI: Aiere. Li Ciente Lire pecché non l’hai portate a D.^a Rosa?

FELICE: E chi nce ha penzato cchiù, io aggio passate ll’aneme de li guaje!

LUIGI: Che guaje?

FELICE: Quanno tu partiste, io la sera distratto, me ritiraje a la casa vecchia, e mentre steva parlanno co la nnammorata toja, venette lo patre a tiempo, allora pe non me fà vedé me chiudette fore a lo balcone, venette a chiovere e me nfunnette, pe m’asciuttà lo soprabito, lo situaje ncoppa a na seggia, D. Ambrogio nce trovaje dinta a la sacca li carte toje, e credennose che io era Luigi Belfiore, se pigliaje li quindici mila lire mieje, dicennome che me l’avarria restituite quanno io me sposava la figlia.

LUIGI: Tu che dice!

FELICE: Eh, che dico. Le bì ccà, le bì, mò proprio me l’ha date. Mò sta llà dinto nzieme co Carmela, stanno aspettanno a me.

LUIGI: E tu che faje?

FELICE: Ch’aggia da fa, io tengo la sposa e lo patre che me stanno aspettanno da llà.

LUIGI: E Carmela se sposa a te?

FELICE: A me, e comme me la pigliavo?... Ha finto pe non me fà perdere li denare... (Mò vide che ammoina succede ccà ncoppa). Aspetta, me vene nu pensiero ccà tanno tutte li carte pronte, per il matrimonio, fra Luigi Belfiore e Carmela Pallone, tu mò stai ccà... D. Ambrogio te conosce?

LUIGI: No, non m’ha visto mai.

FELICE: Benissimo... co la scusa de firmà comme a testimone.. putarisse... jammo a vedé si è venuto lo Vice Sinneco e si trovammo quacche impiegato che le potimmo parlà de sto fatto...

LUIGI: Sarria no bello colpo, caspita!

FELICE: Jamme, jamme a vedé. (Viano dal Vice Sindaco.)