SCENA QUARTA

Fortunato, Ciccillo e detti.

FORTUNATO (esce con le mani dietro la schiena, pallido): Che aggio da fà? Che pozzo fà? Se hanno da contentà, o vonno o non vonno. Venene li fische, e che me ne preme? Sono troppo conosciuto in arte. (Ciccillo lo segue con grosso involto di panni.) Ciccì, famme lu piacere: non ridere che me tuocche li nierve!

ERRICO: Buonasera, D. Fortunà.

FORTUNATO: Oh D. Errì buonasera. D. Errì, io lo vestito da Guido dinto a la Francesca non lo tengo, me lo vennette.

ERRICO: Vuje che dicite?... E comme se fa?

FORTUNATO: E che vulite da me?... Ccà so’ quinnece juorne che non pigliamme paga, e pò io sapeva che asceva mmiezzo n’auta vota sta Francesca!

ERRICO: E che ve mettite stasera?

FORTUNATO: M’aggio portato chillo cammese niro de quanno faceva lo mago Aristone... Non tengo niente cchiù... Ciccì, non ridere, mò te sciacco!

ERRICO: Ma, scusate, chillo ha da ridere afforza. Vuje volite fà Guido, vestuto da mago!

FORTUNATO: E che vulite da me?... Che aggio da fà? Se sape, stasera è l’ultima recita, le casse col vestiario sono partite. Non ve ne incaricate.

ERRICO: Eppure dicite buono, a chelle che n’esce n’esce!

FORTUNATO: (Ciccì, dimme na cosa, lo putecaro t’ha dato li ccicole e lo ppane?).

CICCILLO: (Li ccicole non me l’ha volute dà, ha ditto che chillo gilè che l’avite mannato è viecchio assai, e non va’ manco meza lira. M’ha dato tre solde de pane, e nce ha mise na saraca mmiezo... Lo vedite ccà?).

FORTUNATO: (Zitto, non fà sentì, damme a me). (Lo prende.) Sta mappata miettela dinto a lu cammarino mio.

CICCILLO: (Va bene). (Sale la scaletta, ed entra nel primo camerino.)

FORTUNATO: (Tengo na famma che me la veco co l’uocchie. Stongo da jere co no casatiello ncuorpo. L’arte più bella, più nobile dev’essere tanto calpestata!). (Mangia.)