SCENA DECIMA

Concettina, poi Pasquale, indi Saverio.

CONCETTINA Neh, Felì, ma ch’aggio da fà co lo sinneco, stasera? Ma chillo ch’è pazzo?

FELICE: Pecché? Ch’è stato?

CONCETTINA Vò che io non me muovo da vicino a isso, vò stà co la mana mia mmano, e tutto se vrucculea. La gente guarda, io me metto scuorno.

FELICE: Agge pacienzia, Cuncettì, tiene nu poco de prudenza. Chille ha fatto stutà li cammarine.

CONCETTINA: N’auta vota? Uh! Che pozza passà nu guajo!

LUIGI: D.^a Cuncettì, non mporta, fingete per questa sera.

FELICE: Nuje dimane, a primma matina, nce ne jamme.

ERRICO: Insomma che facimmo?

ARTURO: Nuje a lo scuro non nce potimmo vestì.

FORTUNATO: Se non mi date la luce, me ne vaco co tutta la barba.

ERRICO: E nuje pure nce ne jamme!

FELICE: Nu momento, aggiate pacienzia.

LUIGI: Jate, D.^a Concettì, jate...

CONCETTINA: Vuje vedite io ch’aggio passato! Ma ve prevengo però, che si se spinge assaje, stasera lo sciacco! Lo tengo nnanze all’uocchie!... (Via nel palco.)

LUIGI: E faciarria buono, a la verità!

FELICE: Ma sono cose nuove, sapete! Queste sono abusi di potere!

PASQUALE: D. Felì, llà, a lo potechino, nce stà na folla accussì! Vanno trovanno a buje.

FELICE: E ch’aggio da fà?... Io biglietti non ne tengo cchiù. Jamme a vedé, D. Luigì.

LUIGI: Che bella cosa! Sarrà un teatro imponente!

SAVERIO (esce dal palco allegro): Giacomì, appiccia! (Entra. Giacomino esegue, la scena si rischiara.)

ERRICO: Oh!...

FORTUNATO: Finalmente!

ARTURO: Jammoncenne, mò vedimmo si nce potimmo vestì. (Entrano nei camerini.)

LUIGI: Che donna quella sorella vostra, che bontà!

FELICE: Vedite si nu frate pò suppurtà sta rrobba!

LUIGI: Non fa niente, abbiate pazienza. (Via con Felice e Pasquale per la destra.)