IntraText Indice: Generale - Opera | Parole: Alfabetica - Frequenza - Rovesciate - Lunghezza - Statistiche | Aiuto | Biblioteca IntraText |
I link alle concordanze si evidenziano comunque al passaggio
CICCIO (con altro quadro): Eccome ccà, D. Felì... che d’è, se n’è ghiuto? E addà è ghiuto?
CICCIO: Nun lo saccio, sarrà ghiuto a fà marenna.
CANDIDA: Teh, liegge stu bigliettino che steve appuntato cu na spingola vicino a lo curzè. (Lo dà.)
CICCIO (legge): «Tre centimetri più largo, di raso crema con bordi di merletto bianco, spedirlo alla Signora Concetta Pastafina, Torre Annunziata».
CANDIDA: Capisci, questo è l’uomo che tu difende sempe, chisto è lo buono marito che hai dato a chella povera figliola disgraziata!
CICCIO: Zitto, nun fà ammuina, nun fà sentere a Luisella.
CANDIDA: Se n’è venuto co la mugliera de lo Capostazione de Monaco, mbruglione, birbante!
CICCIO: E chi sarrà sta Concetta Pastafina?
CANDIDA: E chi ne sape niente, chi ne sape niente, povera criatura, povera figlia mia! Ma sì l’aggio ditto, la visione è stata troppo chiara, l’angelo lo teneva afferrato pe li capille, e nun lo lassava.
CICCIO: Comme avarrieme da fà pe sapé sta femmena chi è?
CANDIDA: Isso teneva la faccia de nu diavolo, e l’angelo lo teneva forte forte.
CICCIO: A me me pare che sta Concetta Pastafina...
CANDIDA: Perciò l’angelo me guardava e redeva. Comme avesse ditto: Lo vì là lo vì, chisto ve nganna... Figlia mia, figlia mia!
CICCIO: Statte zitta, mannaggia l’arma de mammeta! Mò te chiavo lo quadro ncapo! Nuje nun avimma da fà ammuina, s’ha da cercà d’appurà tutte cose.
CANDIDA: Nce penz’io, nce penz’io, nun te n’incarricà. Isso ha da fà chello che ha da fà, si no so’ guaje, vì, so’ guaje! (Via a sinistra.)
CICCIO: Ma vedete la combinazione. Chella va a truvà lo biglietto appuntato vicino a lo curzè, è distratto pure. Io, per esempio, quanno aggio fatto quacche scappatella, aggio badato a tutto, non me so’ fatto mai scommiglià, le cose bisogna saperle fare.